Sharýalarǵa 400 myń tonna dızel otyny arzan baǵada beriledi – mınıstrlik

NUR-SULTAN. QazAqparat – Kóktemgi egis jumystaryn júrgizý úshin aýyl sharýashylyǵy taýaryn óndirýshilerine arzandatylǵan baǵamen dızel otyny bólindi. Bul týraly QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Prezıdenttiń Qazaqstan halqyna Joldaýy aıasynda sharýalardy qolaıly baǵamen janar-jaǵarmaı materıaldarymen qamtamasyz etý jumysy júrgiziledi. Búgingi kúni kóktemgi egis jumystaryn ýaqytyly jáne turaqty júrgizý úshin aýyl sharýashylyǵy taýaryn óndirýshilerine munaı óńdeý zaýyttarynda 1 tonnasyna 212 myń teńge baǵamen 400 myń tonna dızel otyny bólindi, bul óńirge baılanysty bólshek saýda baǵasynan orta eseppen 15-30%-ǵa tómen», - dedi Energetıka mınıstri Úkimet otyrysynda.

Buǵan deıin B. Aqsholaqov jyl basynan beri elimizde 22 mln tonna munaı óndirilgenin aıtqan bolatyn. Qańtar-naýryz aılarynda 17,6 mln tonna munaı eksporttalǵan.

Sonymen birge, Qazaqstannan benzın, dızel otynyn jáne munaı ónimderiniń basqa da jekelegen túrlerin áketýge salynǵan tyıym taǵy 6 aıǵa uzarady.