Sharýalarǵa 11 mlrd tekshe metr sý berildi: vegetatsııa maýsymy qalaı ótti
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Túrkistan oblysyna jumys sapary aıasynda óńirdegi sharýalarmen kezdesti.
Mınıstrliktiń baspasóz qyzmetiniń málimetinshe, bıylǵy vegetatsııa kezeńinde «Qazsýshar» RMK-nyń jergilikti fılıaly óńirdegi sharýa qojalyqtarymen sýarmaly sý berý jóninde 12 409 kelisimshart jasasty. Jergilikti sharýa qojalyqtarynyń ókilderi Sý resýrstary jáne ırrıgatsııa mınıstrligine jáne «Qazsýshar» RMK mamandaryna sýarmaly jerlerdi sýmen ýaqytyly ári turaqty qamtamasyz etkeni úshin alǵystaryn bildirdi.
— Bıyl sýdy turaqty ári ýaqytyly aldyq. Byltyr sýǵa qatysty ótinish jasap edik. Mine bıyl oryndalyp jatyr. Atqarylyp jatqan jumystar úshin mınıstrlikke rahmet aıtqymyz keledi. Qazir kanaldar betondalyp, sorǵylar ornatylyp jatyr. Elge jasap jatqan qajyrly eńbekterińiz úshin alǵys aıtamyn, — dedi Otyrar aýdanynyń dıqany Qaljan Jaımyrza.
Qazaqstan boıynsha 2026 jylǵy vegetatsııa kezeńinde 1,2 mln gektar jerdi sýarý úshin shamamen 11 mlrd tekshe metr sý alý josparlanǵan. Aldyn ala málimet boıynsha, búgingi tańda sharýalarǵa shamamen 11 mlrd tekshe metr sý berilip, 1,16 mln gektar jer sýaryldy.
Qazirgi ýaqytta vegetatsııa maýsymy aıaqtalý satysyna ótip, qalypty rejımde júrgizilip jatyr. Sharýalarmen kezdesýden keıin Nurjan Nurjigitov «Dostyq» memleketaralyq kanalyna baryp, nysannyń jumysymen jáne ákimshilik ári qyzmettik ǵımarattarda júrgizilgen kúrdeli jóndeý jumystarynyń nátıjelerimen tanysty.
Qazir «Dostyq» kanalynda 62 maman eńbek etedi. Sý resýrstary jáne ırrıgatsııa mınıstriniń tapsyrmasy boıynsha olardyń jalaqysy orta eseppen 55%-ǵa kóterildi. Qyzmetkerlerdiń eń tómengi jalaqysy 94 myń teńgeden 226 myń teńgege deıin ósti.
— Sý jetkizý máselesi bir tártipke keltirildi. Bıyl sýarý maýsymy jaqsy ótti. Eshqandaı másele bolǵan joq. Jalaqymyz da aıtarlyqtaı kóterildi. Shynymdy aıtsam, rızashylyǵymyzdy qalaı jetkizerimdi bilmeı turmyn, — dedi «Dostyq» kanalynyń tehnıgi Jumabek Tileýmbetov.
Nurjan Nurjigitov nysandy aralap, dıqandarmen taǵy bir kezdesý ótkizdi. Kezdesý barysynda sharýa qojalyqtarynyń ókilderi sýarý kezeńi aıaqtalǵannan keıin «Dostyq» kanalyn mehanıkalyq ádispen tazalaý týraly usynys bildirdi.
— Sý salasy mamandarynyń tynymsyz eńbeginiń arqasynda bıyl elimizdiń ońtústigindegi barlyq bes oblysta sýarý maýsymynyń turaqty ótýin qamtamasyz ete aldyq. Sýdy paıdalaný lımıtterin saqtaý, egis alqaptarynyń qurylymyn ártaraptandyrý jáne ylǵaldy kóp qajet etetin daqyldardyń kólemin qysqartý sııaqty sharalar sý resýrstaryn paıdalaný tıimdiligin arttyrýǵa múmkindik berdi. Bıllıng júıesin engizý jáne kelisimshart jasaý protsesin tsıfrlandyrý sýdy bólýdi barynsha ashyq etip, búkil sý sharýashylyǵy salasynda tártip ornatýǵa múmkindik berdi. Aldaǵy ýaqytta da jumysymyzdy osy baǵytta jalǵastyramyz, — dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin Túrkistan oblysynyń Jetisaı jáne Maqtaaral aýdandaryndaǵy dıqandar maqta jınaýǵa kiriskenin jazǵanbyz.
