Sharýalardy jeńildikpen nesıeleýge 44,7 mlrd teńge baǵyttalady
ASTANA. QazAqparat - «QazAgro» holdıngi 2017-2021 jyldarǵa arnalǵan «Eńbek» nátıjeli jumyspen qamtýdy damytý jáne jappaı kásipkerlik baǵdarlamasyn iske asyrý sheńberinde jumyssyz azamattar, ózin-ózi jumyspen qamtýshylar, aýylsharýashylyq kooperatıvteri men onyń músheleri, sondaı-aq shaǵyn kásipkerlik sýbektileri, ótinim qarastyrýda basymdylyq beriletin kooperatıvterge nesıeleýdi jalǵastyrady, dep habarlaıdy QazAqparat.
«Eńbek» baǵdarlamasynyń erekshe sharttary jobalar sanynyń 20%-y aýyldaǵy startap jobalardy quraıdy, al endi 20%-y - aýyldyq jerlerdegi aýylsharýashylyǵynan tys bıznes jobalary», - dedi «Agrarlyq nesıe korporatsııasy» AQ basqarma tóraǵasy Narmuqan Sarybaev.
Onyń aıtýynsha, «Eńbek» baǵdarlamasy sheńberinde jeńildetilgen shaǵyn nesıeler 5 jylǵa deıingi merzimge beriledi, mal sharýashylyǵy salasyndaǵy jobalarǵa jáne aýylsharýashylyq kooperatıvterin qurý úshin - 7 jylǵa deıin beriledi. Syıaqynyń jyldyq tıimdi mólsherlemesi - jyldyq 6%-dan aspaıdy. Sharýa qojalyqtary men fermerlik sharýashylyqtar úshin aýylsharýashylyq salasyndaǵy jobalarǵa shaǵyn nesıelerdiń kólemi 19 mln teńgege deıingi somany quraıdy, osyǵan uqsas - aýylsharýashylyǵyna jatpaıtyn bıznes túrleri úshin 3 mln teńgege deıingi nesıe qarajaty bólinedi. Nesıeler mal sharýashylyǵyna, ósimdik sharýashylyǵyna, sondaı-aq aýyldyq jerlerdegi bıznestiń aýylsharýashylyǵynan tys túrlerine beriletin bolady.
2018 jyly «Eńbek» baǵdarlamasy Jumyspen qamtý baǵdarlamasy boıynsha nesıeleýge 44,7 mlrd teńge baǵyttaý jáne AShTÓ keminde 290 kepildik berý josparlanǵan.
N.Sarybaevtyń aıtýynsha, qazirgi ýaqytta holdıng enshiles operator kompanııalary arqyly shamamen 12,5 mlrd teńge somasyna jalpy 3 288 nesıe berilgen (nemese qarajattyń josparly kóleminiń 28 % ıgerilgen). Nesıe qarajatynyń kómegimen 2481 adam jumyspen qamtylǵan.
