Sharýalardy jeńildetilgen lızıngti qarjylandyrý kólemi 450 mlrd teńgege ulǵaıady

ASTANA. KAZINFORM – Úkimet aýyl sharýashylyǵy tehnıkasy parkin jańartý maqsatynda (Aýyl sharýashylyǵy mınıstrligi arqyly) memlekettik qoldaýdyń keshendi sharalaryn belsendi túrde júzege asyryp keledi.

Negizgi quraldar qatarynda – ınvestıtsııalyq sýbsıdııalar, nesıe men lızıng boıynsha syıaqy mólsherlemelerin sýbsıdııalaý, sondaı-aq tehnıkaǵa jeńildetilgen lızıng baǵdarlamasy bar. Bul tetikter sharýalarǵa zamanaýı tehnıkany tıimdi sharttarmen satyp alýǵa múmkindik beredi.

Eń mańyzdy yntalandyrý – bul ınvestıtsııalyq sýbsıdııalaý baǵdarlamasy, onyń aıasynda sharýalarǵa satyp alynǵan tehnıka qunynyń 15%-dan 30%-ǵa deıingi bóligi óteledi (tehnıkanyń basymdyq deńgeıine qaraı). Qosymsha qoldaý retinde – syıaqy mólsherlemesin sýbsıdııalaý júzege asyrylady: basym tehnıka boıynsha 6%-ǵa deıin, al qalǵan túrleri boıynsha 15%-ǵa deıin. Sonymen qatar tehnıkaǵa jeńildetilgen lızıng baǵdarlamasy da qarqyndy damyp keledi, ol sharýalarǵa jyldyq 5% mólsherlememen tehnıka alýǵa múmkindik beredi.

2025 jylǵy 1 qańtardaǵy jaǵdaı boıynsha respýblıkada 139 myń traktor, 31 myń kombaın, 5,6 myń egis kesheni, 71 myń tuqym sepkish jáne 141 myń topyraq óńdeıtin qural bar. 2024 jyly tehnıka parkin jańartý deńgeıi 5,5%-dy qurap, 2023 jylǵy kórsetkishten (4,5%) aıtarlyqtaı joǵary boldy. 2025 jylǵa arnalǵan mindet – jańartý deńgeıin 6,5%-ǵa deıin jetkizý. Jalpy alǵanda, aýyl sharýashylyǵy tehnıkasy parkin tehnologııalyq turǵydan zamanaýı deńgeıde ustaý úshin jańartý kórsetkishin 8-10%-ǵa deıin jetkizý qajet.

Mınıstrlik 2028 jylǵa deıin tehnıka parkin jańartý deńgeıin 9%-ǵa jetkizýdi josparlap otyr. Osyǵan baılanysty Memleket basshysynyń tapsyrmasy boıynsha aýyl sharýashylyǵy tehnıkasynyń jeńildetilgen lızıngi baǵdarlamasyn qarjylandyrý kólemin 450 mlrd teńgege deıin arttyrý josparlanǵan.

Búginde mashına-traktor parkin jańartýdy jedeldetý boıynsha qabyldanyp jatqan memlekettik qoldaý sharalary óz tıimdiligin kórsetip otyr. Bul oń serpindi sandar da rastaıdy: eger 2017 jyly nebári 8,5 myń birlik tehnıka satyp alynǵan bolsa, 2024 jyldyń qorytyndysy boıynsha olardyń sany 22,1 myń birlikke jetip, kórsetkish 2,5 esege artty.

Ásirese «Jeńildetilgen lızıng» baǵdarlamasy aıasyndaǵy ilgerileý aıqyn baıqalady: 2025 jyly atalǵan baǵdarlamaǵa keminde 250 mlrd teńge bólinip, shamamen 6 myń birlik tehnıka satyp alynady. 24 aqpannan bastap – ótinimder qabyldaý bastalǵan kúnnen beri «QazAgroQarjy» AQ-ǵa 3555 ótinish kelip tústi, olardyń jalpy somasy – 129,2 mlrd teńge. Qazirdiń ózinde 2400 shart jasalyp, jalpy quny 85,7 mlrd teńge bolatyn 4580 birlik tehnıka jetkizý josparlanǵan.

Zamanaýı egis keshenderi aǵymdaǵy egis naýqanyna da belsendi tartylǵan – 5,6 myń birlik tehnıka dándi daqyldar egistiginiń 70%-ǵa deıingi aýmaǵyn qamtıdy. Bul – John Deere, CLASS, RSM sekildi jetekshi jahandyq brendterdiń tehnıkasy. Olar dál eginshiliktiń zamanaýı júıelerimen jabdyqtalǵan: GPS, avtopılottar, tuqymdy, tyńaıtqysh pen gerbıtsıdti dál sebý júıeleri.

Egis jumystary úshin mańyzdy faktor – janar-jaǵarmaı materıaldarymen (JJM) úzdiksiz qamtamasyz etý. 2025 jyly egis jumystaryna 401 myń tonna dızel otyny bólindi. 2024 jyly – 376,4 myń tonna. Aýyl sharýashylyǵy óndirýshilerinen barlyǵy shamamen 17 myń ótinim kelip tústi. Baǵany retteý sharalarynyń arqasynda dızel otynynyń sońǵy baǵasy lıtrine 254 teńgeni qurady – bul naryqtyq baǵadan 15–20% tómen (AZS-te – 301-307 teńge/lıtr).

Aıta keteıik, bıyl 23,7 mln gektar jerge aýyl sharýashylyǵy daqyldary egildi.