Sharýalardy qoldaýǵa júzdegen mlrd qarajat bólinedi – mınıstr
ASTANA. KAZINFORM – Qazaqstanda mal sharýashylyǵyn qoldaýǵa Agrarlyq nesıe korporatsııasy arqyly 84 mlrd teńge bıýdjet kredıtin bólý usynyldy. Sonymen qatar osy salaǵa uzaq merzimdi qaryz retinde 270 mlrd teńge qarastyrylǵan. Bul týraly Úkimet otyrysynda Aýyl sharýashylyǵy mınıstri Aıdarbek Saparov málimdedi.
Mınıstrdiń aıtýynsha, sharýalardy uzaq merzimdi jeńildetilgen qarjylandyrýmen qamtamasyz etý úshin bıýdjet jáne kommertsııalyq qarajatty ushtastyrý tetigi qoldanylady. Bul qolma-qol aqshany baqylaý shotyndaǵy qarajat jetkiliksiz bolǵanda da sharýalardy ýaqytyly qarjylandyrýǵa múmkindik beredi.
Osy maqsatta «Báıterek» holdıngi kýpondyq syıaqyny sýbsıdııalaý tetigi arqyly bıýdjetten tys qarajat tartýdy jalǵastyryp, ony agroónerkásiptik keshenge kredıt berýge baǵyttaýy qajet.
– Bıyl «Báıterek» holdıngi arqyly uzaq merzimdi qaryzǵa 270 mlrd teńge, al 2027 jylǵa 220 mlrd teńge qarastyrylǵan. Onyń ishinde mal satyp alýǵa qazirgi ýaqytta 64,2 mlrd teńge baǵyttalǵan. Belgilengen maqsattardy tolyq iske asyrý úshin Agrarlyq nesıe korporatsııasy arqyly mal sharýashylyǵyn qoldaýǵa 84 mlrd teńge bıýdjet kredıtin bólý qajet, – dedi Aıdarbek Saparov.
Sondaı-aq, Qazaqstannyń Damý Banki arqyly ınvestıtsııalyq jobalardy iske asyrýǵa 2026 jyly 35 mlrd teńge bólinýi qajet.
Otandyq traktorlar men kombaındar óndirisin ulǵaıtý tapsyrmasyn oryndaý úshin bıyl QazAgroQarjy arqyly bıýdjettik kredıtke 50 mlrd teńge bólýdi qamtamasyz etý qajet.
Budan bólek, Quryltaı depýtattary QazAgroQarjyǵa qosymsha 37,5 mlrd teńge bólýdi usyndy. Bul 2027 jyly aýyl sharýashylyǵy tehnıkasynyń jeńildetilgen lızıngine 200 mlrd teńge tartýǵa múmkindik beredi.
– Soltústik Qazaqstan oblysynyń tájirıbesin taratý aıasynda 2027 jyly mal satyp alýǵa jeńildetilgen kredıt berý úshin qosymsha 50 mlrd teńge bólý usynyldy. Qarjylandyrý senim bildirilgen agent arqyly júzege asyrylady, – dedi Aýyl sharýashylyǵy mınıstri.
Keshe Memleket basshysy Qasym-Jomart Toqaev Qazaqstan halqyna Joldaýynda sharýalardy ınvestıtsııalaıtyn pármendi tásil engizýdi tapsyrǵan edi.
Sonymen birge Q.Toqaev aýyl sharýashylyǵy ónimderin tereń óńdeý isin damytýǵa basa mán berý keregin aıtty.
