Sharýalar jeńildetilgen nesıe berý baǵdarlamasy boıynsha 8 myńnan astam jańa aýyl sharýashylyǵy tehnıkasyn satyp aldy
ASTANA. KAZINFORM – Qazaqstandyq sharýalar jeńildetilgen nesıe berý baǵdarlamasy boıynsha 8 myńnan astam jańa aýyl sharýashylyǵy tehnıkasyn satyp aldy. Bul týraly Úkimet músheleriniń qatysýymen «AMANAT» partııasy fraktsııasynyń keńeıtilgen otyrysynda Oljas Bektenov málim etti.
Aýyl sharýashylyǵy – elimiz úshin asa mańyzdy sala. Úkimet basshysy AÓK-ti jańa deńgeıge shyǵarý úshin zamanaýı agrotehnologııalardy qoldanýǵa jáne aýyl sharýashylyǵy tehnıkasy parkin jańartýǵa basymdyq berilýge tıis ekenin atap ótti.
Egis alqaptaryn ártaraptandyrý jáne tuqym qorynyń sapasyn arttyrý qajet. Bul baǵytta qazirgi tańda bıdaı alqaptary kezeń-kezeńmen qysqartylyp, maıly daqyldar jáne qant qyzylshasynyń egistikteri kóbeıip keledi. Sýdy kóp qajet etetin daqyldardyń egis alqaptary azaıtylyp jatyr. Bıyl egis naýqanyn qarjylyq jáne materıaldyq-tehnıkalyq qamtamasyz etý máseleleri sheshildi. Kóktemgi dala jumystaryn, egin jınaý naýqanyn, aýyl sharýashylyǵy tehnıkasyn lızıngke satyp alýdy jáne t. b. qarjylandyrý tórt esege, 580 mlrd teńgege deıin ósti. Bul sońǵy jyldardaǵy eń aýqymdy qarjylandyrý kólemi.
Otandyq óndiris shyǵaratyn aýyl sharýashylyǵy tehnıkasynyń jeńildetilgen lızınginiń jańa baǵdarlamasy iske qosyldy. Baǵdarlamany qarjylandyrýdyń jyldyq kólemi 5% mólsherlememen 100 mlrd teńgeni quraıdy. Bıylǵy 8 aıdyń ishinde dıhandar 155 mlrd 700 mln teńgege 8 myńnan astam jańa aýyl sharýashylyǵy tehnıkasyn satyp aldy.
«Agrarlyq sektordy damytýda aýyl sharýashylyǵy ónimderin qaıta óńdeý mańyzdy oryn alady. Prezıdent qaıta óńdelgen ónim úlesin 70%-ǵa deıin arttyrýdy tapsyrdy. Bul baǵytta óńdeýshi kásiporyndardy qoljetimdi shıkizatpen qamtamasyz etý, jeńildetilgen qarjylandyrý, ishki naryqty qorǵaý jáne otandyq ónimderdiń eksportyn qoldaý sharalary iske asyrylyp jatyr. «Aýyl amanaty» jobasy boıynsha aýqymdy jumys júrgizilip jatyr. Sońǵy 2 jylda aýyl turǵyndaryna 100 mlrd teńgeden astam somaǵa shaǵyn nesıeler berildi. Nátıjesinde 20 myńǵa jýyq azamat óz kásibin ashty», — dedi Premer-Mınıstr.
Sondaı-aq Oljas Bektenov egin jınaý naýqanyn eskere otyryp, astyqty saqtaý, logıstıka jáne qosymsha jeńildetilgen janar-jaǵarmaı bólý máselelerin jedel sheshý boıynsha tıisti jumystar júrgizilip jatqanyn atap ótti.
