Sharýalar nesıe alý úshin qaǵaz qujat tapsyryp júr – Úkimet tsıfrlyq sheshimderdi kóbeıtedi

ASTANA. KAZINFORM — Dıqandardy tsıfrlyq sheshimderdi keńirek qoldanýǵa yntalandyrý qajet. Bul týraly Premer-mınıstr Oljas Bektenov Úkimet otyrysynda aıtty. 

Tsıfrlyq tehnologııalar klımattyq syn-qaterdi boljaýda, ónim kólemin baǵalaýda, sondaı-aq ósimdikterdi zııankesterden qorǵaý quraldary men tyńaıtqyshtardy tıimdi paıdalanýda mańyzdy ról atqarady.

Tsıfrlandyrý sý resýrstaryn da ońtaıly basqarýǵa múmkindik beredi. Úkimet basshysy múddeli memlekettik organdarǵa otandyq tehnologııalyq sheshimder men startaptardy osy jumystarǵa tartýdy tapsyrdy.

— Sharýalar osy ýaqytqa deıin nesıe alý úshin qajetti anyqtamalardy qaǵaz túrinde tapsyrýǵa májbúr. Bul — óte qolaısyz ári tym uzaq. Aýyl sharýashylyǵy mınıstrligine Tsıfrlyq damý mınıstrligimen jáne «Báıterek» holdıngimen birlesip, dıqandarǵa tıimdi ári ashyq memlekettik qoldaý kórsetý úshin jeńildetilgen nesıe berýdiń tehnıkalyq rásimin ońaılatyp, ony tsıfrlyq formatqa aýystyrýdy tapsyramyn, — dedi Oljas Bektenov búgingi Úkimet otyrysynda.

Al Sý resýrstary mınıstrligi vegetatsııalyq kezeńde fermerlerdi eginge qajetti sýmen úzdiksiz qamtamasyz etý sharalaryn qabyldaýy qajet.

— Dıqandardy tamshylatyp jáne jańbyrlatyp sýarý júıesine kóshýge yntalandyryp, sý únemdeý tehnologııalaryn engizý jumystaryn kúsheıtý kerek. Soltústik jáne shyǵys óńirlerdiń ákimdikteri qar toqtatý jáne sý qoryn jınaý sharalaryn júrgizýi qajet. Ekologııa mınıstrligi egin egý merzimderin aldyn ala josparlap, aýa raıynyń ózgerýine baılanysty jedel áreket etý úshin dıqandarǵa meteorologııalyq boljamdardy ýaqytyly berip otyrýǵa tıis, — dedi Premer-mınıstr.

Buǵan deıin Oljas Bektenov egin jumystaryna úshinshi jyl qatarynan qomaqty qarjy bólinip otyrǵanyn aıtqan edi.

Sondaı-aq sharýalarǵa arnalǵan dızel naryqtaǵy baǵadan 15% arzan bolady.