Sharýalar men kásiporyndardyń kelispeýinen dıirmender jumysy toqtap tur –mınıstrlik
«Mınıstrlik tarapynan, jalpy, qandaı da bolsyn aýyl sharýashylyq daqylyna nemese taýaryna monıtorıng apta saıyn júrgiziledi. Naýryz aıyna deıingi nemese keıingi jaǵdaıǵa árıne taldaý jasaldy. Ekinshiden, Astyq óndirýshiler odaǵy osy jaǵdaı týraly, birneshe oblysta, sonyń ishinde Reseımen shekaralas óńirlerdiń astyq óńdeý kásiporyndary qazirgi kezde jumystaryn ýaqytsha toqtatqanyn aıtqan edi. Búginde ishki naryqta bıdaıdyń qajetti kólemi bar. Biraq bıdaı baǵasy –endi ǵana týyndaǵan másele. ıAǵnı, sharýalardyń kóktemgi dala jumystaryna degen shyǵystaryn eskere otyryp usynatyn ońtaıly baǵasy bar. Bul baǵa un tartýshylar tarapynan narazylyq týdyryp, eki arada belgili bir kelisim bolmaı tur. Sondyqtan qazir un tartý kásiporyndarynyń ýaqytsha toqtaýynyń negizgi sebebi osy. Jalpy ishki naryqta bıdaı bar, biraq un tartý kásiporyndarynan beriletin baǵa men sharýalar tarapynan usynylǵan baǵanyń arasynda úlken araqatynas bar. Bul máseleni biz ishki naryqqa arzandatylǵan bıdaı jiberý arqyly sheship otyrmyz», - dedi Nazgúl Hatepova Ortalyq kommýnıkatsııalar qyzmetinde ótken baspasóz máslıhatynda.
Buǵan deıin Astyq óńdeýshiler odaǵy elimizde bir jarym aptaǵa ǵana jeterlik bıdaı qory qalǵanyn málimdegen edi. Astyq ósirýshiler men óńdeýshiler bıdaıdy bólise almaı daý týǵany, bıdaı taýsylsa barlyq dıirmender jumysyn toqtatýǵa májbúr ekeni aıtylǵan edi.
Óz kezeginde Aıdarbek Saparov elde eshqandaı astyq tapshylyǵy joq ekenin málimdedi. 1 sáýirdegi jaǵdaı boıynsha respýblıkada 6,4 mln tonna astyq bolǵan.
7 sáýirdegi jaǵdaı boıynsha eldegi un qory 118 myń tonnaǵa jetedi, onyń ishinde: turaqtandyrý qorlarynda - 10,4 myń tonna, «aınalym shemasy» aıasynda – 22 myń tonna, óndirýshilerde – 48,6 myń tonna, qoımalarda – shamamen 20 myń tonna jáne saýda obektilerinde – 18 myń tonna bar. Atalǵan kólem ishki qajettilikti qamtamasyz etýge tolyq jetkilikti.
