Sharýalar mal basyna qaraı sýbsıdııalanatyn memlekettik kómekti paıdalana almaı otyr - S. Aqylbaı

ASTANA. 18 sáýir. QazAqparat - Búgin QR Parlamenti Senatynyń jalpy otyrysynda senator Serik Aqylbaı sharýa qojalyqtaryna óndirilgen etke, sútke, qymyzǵa jáne mal azyǵynyń qunyn arzandatýǵa sýbsıdııalarynyń tólenýi týraly másele kóterip, Úkimet basshysynyń atyna saýal joldady.

Senatordyń sózine qaraǵanda, qazirgi tańda iri qara etine sýbsıdııa alý úshin jyl boıy 400 bas ógizshe bordaqylanyp satylýy kerek. Aq qoı etine sýbsıdııa alý úshin sharýashylyqtaǵy analyq qoıdyń sany 600 bastan, jylqy etine bıeniń sany 75 bastan, qymyzǵa 35 bastan kem bolmaýy qajet eken.

«Máselen, Qaraǵandy oblysynyń Qarqaraly aýdany boıynsha 600-den astam sharýa qojalyǵy bar. Onyń ishinde qoı etine 19 sharýa qojalyǵy, jylqy etine - 6, qymyzǵa - 7, mal azyǵyna - 88 sharýa qojalyqtary sýbsıdııa alady. Al iri qara etine aýdanda birde-bir sharýashylyq sýbsıdııa almaıdy. Osydan, kóptegen sharýshylyqtar mal basynyń joǵaryda atalǵan talaptarǵa sáıkes kelmeýine baılanysty memleket tarapynan beriletin kómekti paıdalana almaı otyr. Osylaı, qazirgi kezdegi erejelerge ózgeris engizilse, kóptegen usaq sharýa qojalyqtaryn damytýǵa, et ónimderin molaıtýǵa jáne sapasyn jaqsartýǵa múmkindik týar edi», - deıdi senator S. Aqylbaı.

Bul rette depýtat iri qara etine sýbsıdııa alý úshin satylatyn mal basyn 100 basqa, qoı etine sýbsıdııa alý úshin analyq qoıdyń sanyn 300 basqa, jylqy etine bıe sanyn 50 basqa, qymyzǵa 20 basqa deıin azaıtsa degen usynysyn jetkizdi.