Sharýalar 687 mln teńge tólep, 5,1 mlrd teńge ótemaqy aldy
ASTANA. KAZINFORM — Qazaqstanda 517 myń gektar egistik qurǵaqshylyqtan saqtandyryldy. Qurǵaqshylyqtan saqtanǵan sharýalarǵa 5,1 mlrd teńge tólendi, dep habarlaıdy AShM baspasóz qyzmeti.
Qazaqstanda dándi jáne maıly daqyldar egistigin topyraqtaǵy ylǵal tapshylyǵynan saqtandyrý maýsymy aıaqtaldy. Ótken maýsymda aýyl sharýashylyǵy taýaryn óndirýshiler sýarylmaıtyn jerlerdegi 517,4 myń gektar egis alqabyn saqtandyrdy. Saqtandyrý jaǵdaılary boıynsha sharýalarǵa 5,1 mlrd teńge ótemaqy tólendi.
— Resmı derekterge sáıkes, egistikti qurǵaqshylyqtan saqtandyrý aıasynda barlyǵy 330 shart jasalǵan. Saqtandyrý syılyqaqylarynyń jalpy somasy 3,4 mlrd teńgeni qurady. Onyń 80%-yn memleket sýbsıdııalady. Al aýyl sharýashylyǵy taýaryn óndirýshilerdiń óz qarajaty esebinen tólegen somasy 687,6 mln teńge boldy. Osylaısha, sharýalar saqtandyrýǵa óz qarajatynan jumsaǵan árbir 1 teńgesine shamamen 7,5 teńge kóleminde saqtandyrý tólemin aldy, — delingen mınıstrlik taratqan aqparatta.
Ǵaryshtyq monıtorıng derekterine sáıkes, saqtandyrý qorǵanysy qoldanysta bolǵan kezeńde elimizdiń on óńirinde topyraqtaǵy ylǵal tapshylyǵynan týyndaǵan ortasha, edáýir jáne qatty qurǵaqshylyq tirkeldi. Atap aıtqanda, Abaı, Aqmola, Aqtóbe, Shyǵys Qazaqstan, Jambyl, Batys Qazaqstan, Qaraǵandy, Qostanaı, Pavlodar jáne Soltústik Qazaqstan oblystarynda qurǵaqshylyq qaýpi anyqtaldy. Atalǵan táýekel tirkelgen egis alqaptarynyń jalpy kólemi 385,4 myń gektardy qurady.
Saqtandyrý merzimi ár óńirdiń klımattyq erekshelikterine qaraı belgilendi. Almaty, Jambyl, Qyzylorda, Mańǵystaý jáne Túrkistan oblystarynda, sondaı-aq Jetisý oblysynda saqtandyrý qorǵanysy 2026 jylǵy 15 naýryzdan 15 maýsymǵa deıin qoldanysta boldy. Al Aqmola, Aqtóbe, Atyraý, Shyǵys Qazaqstan, Batys Qazaqstan, Qaraǵandy, Qostanaı, Pavlodar jáne Soltústik Qazaqstan oblystarynda, sondaı-aq Abaı jáne Ulytaý oblystarynda saqtandyrý merzimi 15 mamyrdan 15 qyrkúıekke deıin sozyldy.
— Saqtandyrý kezinde aýyl sharýashylyǵy daqyldarynyń vegetatsııa kezeńindegi ár túrli ýaqytta týyndaıtyn ylǵal tapshylyǵyn eskerýge múmkindik beretin eki jáne úsh fazaly saqtandyrý ónimderi qoldanyldy. Saqtandyrý jaǵdaılary tirkelgen kezde barlyq qarastyrylǵan fazalar boıynsha tólemder júrgizildi: dándi daqyldar úshin úsh fazanyń, al maıly daqyldar úshin eki fazanyń árqaısysy boıynsha ótemaqy tólendi. Sonymen qatar keıbir sharýalar bolashaq eginin saqtandyrýdy maýsym bastalmaı turyp qolǵa alǵan. Saqtandyrylǵan 517,4 myń gektar egis alqabynyń 98,1 myń gektary 2025 jyldyń jeltoqsan aıynda saqtandyrý qorǵanysyna alynǵan, — delingen resmı aqparatta.
Maýsym qorytyndysy aýa raıyna baılanysty táýekeldiń aýqymyn ǵana emes, onyń saldaryn óteý úshin iske qosylǵan qarjylyq tetiktiń de kólemin kórsetedi.
Saqtandyrýǵa ótinim berýden bastap shart jasasý jáne saqtandyrý tólemin alýǵa deıingi barlyq protsess Kezekte.kz platformasynda elektrondy formatta júzege asyrylady.
Osyǵan deıin birqatar óńirde egin jınaý jumystary aıaqtalýǵa jaqyn ekenin jazǵanbyz.
