Sharýa jáne fermerlik qojalyqtardyń qyzmetine qatysty qujat Májiliste qaralatyn boldy

Búgin atalmysh zań jobasyn Senattyń jalpy otyrysynda talqylaǵan senatorlar osyndaı baılamǵa keldi. Atalmysh zań jobasyna baılanysty arnaıy baıandama jasaǵan Aýyl sharýashylyǵy mınıstrliginiń Jaýapty hatshysy Evgenıı Amannyń aıtýynsha, elimizdegi fermerlik jáne sharýa qojalyqtarynyń arasyndaǵy birqatar qyzmetterdi retteý maqsatynda osyndaı zań qabyldaý qajet bolyp otyr. «Zań jobasy Jer kodeksi men «Sharýa jáne fermerlik qojalyqtary týraly» zańyna ózgerister men tolyqtyrýlar engizýdi kerek etedi. Birinshiden, qujat aýyl sharýashylyǵyna baǵyttalǵan, biraq qandaı da bir ǵımarat ornalasqan jer teliminiń qunyn anyqtaý tártibin bekitedi. Ekinshiden, ol sharýa nemese fermerlik qojalyqtary bar azamattardyń jer telimderin alý tártibine qatysty máselelerdi retteıdi. Úshinshiden, zań jobasy sharýa nemese fermerlik qojalyq ıeleriniń quqyqtary men mindetterin egjeı-tegjeıli qarastyrady. Bul óz kezeginde azamattardyń áleýmettik jaǵynan qorǵap, eńbek tártibin talap etip, eńbek pen ol úshin tólenetin jalaqynyń ádiletti bolýy qamtamasyz etedi», - dedi Jaýapty hatshy.

Zań jobasyn depýtattar birinshi oqylymda maquldap, ekinshi oqylymda oǵan qatysty ózara pikir almasa kele, qujatty Májiliske qaıtarý qajet dep sheshti.