Sharýa qojalyqtarynyń qyzmetine arnalǵan zań jobasy maquldandy - Májilis
ASTANA. 8 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palat depýtattary «Qazaqstan Respýblıkasynyń keıbir zańnamalyq aktilerine sharýa (fermer) qojalyqtarynyń qyzmeti máseleleri boıynsha ózgerister men tolyqtyrýlar engizý týraly zań jobasy ekinshi oqylymda maquldady.
Atalǵan jobanyń ázirlený ózektiligi sharýa qojalyqtary qyzmetterin retteý qajettiliginen týyndaǵan. Osyǵan oraı jer kodeksine jáne «sharýa (fermer) qojalyǵy týraly» zańǵa ózgerister engiziledi. Birinshi qoylymda talqylaý barysynda depýtattardyń usynystary boıynsha zań jobasynan sharýa qojalyǵynyń múlkin satqan nemese syıǵa bergen jaǵdaıda satyp alýǵa ýaqytsha uzaq merzimdi jer paıdalaný quqyǵyn berýdi kózdeıtin normalar alynyp tastaldy. Sonymen birge sharýa qojalyqtarynyń maqsaty úshin jertelimderin berý rásimderin ońaılatý, azamattardyń atalǵan maqsattar úshin jer alýǵa degen qyzyǵýshylyǵyn arttyrýǵa baǵyttalǵan tolyqtyrýlar jasaldy. Budan bólek zań jobasymen jer telimine tıisti quqyq alý úshin beriletin qajetti qujattar tizbesi de qysqartyldy. Sonymen qatar depýtattyq korpýs qoldanystaǵy sharýa qojalyqtaryn satyp alatyn jáne bul oraıda arnaýly aýylsharýashylyq bilimi men biliktiligi bar azamattarǵa jer ýchaskesin satyp alýǵa basym quqyqtar berýdi usyndy. Bul túzetýlerge Úkimettiń oń qorytyndysy alynǵan.
Ekinshi oqylym boıynsha maquldanǵan zań jobasy Parlament Senatyna jiberiledi.
