Sharýa qojalyqtary kúsh biriktirse, óndiris shyǵyndary tómendeıdi - Álıhan Smaıylov
Atap aıtqanda, Premer-Mınıstr «Karımov» JK sút-taýar fermasynyń qyzmetimen tanysty. 2022 jyly jergilikti sút óńdeý zaýyttarynyń júktemesin qamtamasyz etý jáne sút ónimderiniń ımportyn azaıtý úshin aıtarlyqtaı keńeıtilgen kásiporynda 900-ge jýyq iri qara mal bar.
Sharýashylyq basshysy Rahym Kárimov Úkimet basshysyna óndiristiń shyǵyndaryn azaıtý jáne onyń ónimdiligin arttyrý úshin shaǵyn jáne orta otbasylyq fermalarǵa qatysty qoldaý sharalaryn keńeıtý múmkindigin qarastyrý týraly ótinishin bildirdi.
«Máseleni sheshýdiń birden-bir joly aýyl sharýashylyǵy kooperatsııasynyń múmkindikterin paıdalaný bolýy múmkin. Qazir bul baǵytqa memleket tarapynan kóp kóńil bólinip otyr. Eger eki-úsh sharýa qojalyǵy kúsh biriktirýdi uıǵarsa, olardyń óndiris shyǵyndary tómendep, paıda úlesi artady. Bul rette irilendirý esebinen osy AÓK sýbektisin ınvestıtsııalyq sýbsıdııalaýmen qamtý múmkindigi paıda bolady», - dep jaýap berdi Álıhan Smaıylov.
Jalpy, Premer-Mınıstrdiń aıtýynsha, búgingi tańda sút baǵytyn memlekettik qoldaý sharalary salany aıtarlyqtaı tehnologııalyq jańǵyrtýǵa múmkindik berdi. Tek keıingi bes jylda sút sharýashylyǵyn qoldaýǵa 82 mlrd teńge baǵyttalǵan.
«Bıyl búkil respýblıka boıynsha Soltústik Qazaqstan oblysynyń tájirıbesin taratý josparlanyp otyr, onda qysqa merzim ishinde sút-taýar fermalaryn qurý boıynsha 21 joba iske asyryldy. Bul jumysty erekshe baqylaýǵa alý qajet», - dedi Álıhan Smaıylov.
