Shartty túrde túrmeden bosaǵandarǵa ne isteýge bolmaıdy
Onyń aıtýynsha, buryn shartty túrde merziminen buryn túrmeden bosap shyqqandardy qadaǵalaý úsh jyl boıy júrgizilip kelgen. Al endigi ýaqytta ákimshilik qadaǵalaý merzimi onyń sottylyǵyn óteý merzimine deıin uzartylady.
«Memleket oǵan senim artyp otyr. Aıtalyq, 7 jylǵa sottalǵan adam jaza merziminiń jartysyn ótegennen keıin 3,5 jyl buryn bostandyqqa shyǵady. Sodan keıin ol túzelý jolyna túskenin, bir jerden jumys taýyp, otbasyn asyrap otyrǵanyn kóremiz. Degenmen, memleket erkindikke jiberip, janashyrlyq tanytqannan keıin onyń aldyna naqty mindetter qoıylady. Ol araq ishpeýi, esirtki zattaryn tutynbaýy qajet. Eger ol araq iship kózge tússe, onda mindettemesin oryndamady, óziniń qylmystyq áreketterin sezingen joq degen sóz. Onda ol bas bostandyǵynan aıyrý ornyna qaıta barady», - dedi Marat Ahmetjanov.
Aıta keteıik, Bas prokýrordyń orynbasary búgin Senat qabyldaǵan «Qazaqstan Respýblıkasynyń keıbir zańnamalyq aktilerine qylmystyq, qylmystyq-protsestik zańnama men quqyq qorǵaý jáne arnaýly memlekettik organdar qyzmetin jetildirý máseleleri boıynsha ózgerister men tolyqtyrýlar engizý týraly» zańnyń keıbir normalaryn BAQ ókilderine túsindirip bergen bolatyn.
