Shartaraptyń sharaınasy - «QazAqparatqa» búgin 94 jyl (FOTO)
ASTANA. QazAqparat - Qazaqstan aqparat keńistiginiń negizgi bazasy ispetti «QazAqparat» Halyqaralyq aqparat agenttiginiń qurylǵanyna búgin 94 jyl tolyp otyr. Bir ǵasyrǵa jýyq ǵumyry bar bul buqaralyq aqparat quralynyń ár kúni tarıh, ár jazbasy qattalǵan el shejiresiniń bolashaq qazynasy.
Eger biz «QazAqparat» Qazaqstannyń jylnamashysy sekildi desek, aldyńǵy býyn aǵalardan bastap, qazirgi jas tolqyn jýrnalıster de keliser dep oılaımyz. Óıtkeni, táýelsizdikke deıingi de, búgingi jańa tarıhtyń da kýágeri bolyp kele jatqan aqparat kózderiniń biri - «QazAqparat». Onda elimizdiń tynys tirshiligindegi ár sát sol qalpynda dereý, mınýt saıyn jańalyq bolyp, birneshe tilde bar jahanǵa tarap keledi.
Ańsaǵan armanymyz táýelsizdikke qol jetip, Qazaqstan Respýblıkasy qutty qadamyn jasaǵanda da QazAqparat alǵashqy bolyp, tarıhı jańalyqtardyń jarshysyna aınaldy. Qazirgi aqparattyq dáýirde BAQ-tyń sany qanshalyqty kóp bolsa, sonshalyqty QazAqparattyń bedeli ústem. Sebebi, ol - senimdi aqparat kózi ǵana emes, «jańalyqtar áleminiń» ustynyndaı. Óıtkeni, elimizdiń barlyq jetistigi, tynys tirshiligi onyń nazarynan tys qalyp kórgen emes. Qazaqstannyń júregi, bar qazaqtyń maqtanyshy aıaýly ASTANA da «QazAqparattyń» kóz aldynda kórkeıdi. Elbasy óz qolymen turǵyzǵan ajarly Astanamyzdyń ár kóshesindegi qalt etken ózgeristi múlt jibermeı dúıim jurtqa, tipti jer jahanǵa qýana jar salyp, jaqsylyqty jarııa etýge asyǵatyn da osy - QazAqparat.
Ras, «QazAqparat» - qoǵamnyń ár salasynda qyzmet etetin san túrli mamandyq ıesi úshin de izdegenin tabatyn, kórgenin alatyn ashyq alań. Ol tarıhshyǵa derek berse, qalamgerdiń qajetine jarap, saıasatkerdiń sózi bola bildi. QazAqparatta ózge otandyq aqparattyq agenttikterinde joq tilshiler jelisi bar. Ásirese, Reseı, Qytaı, Túrkııa, BAÁ, Belgııa, Ázerbaıjan, Ózbekstan, Qyrǵyzstan elderindegi tilshiler jumysyn atap aıtý kerek. Demek, elimizde jáne álemde bolyp jatqan jańalyqtardy on-line rejıminde jedel ári shynaıy taratyp qana qoımaı, biz beıbit Qazaqstannyń óz aqparat keńistigin kórsete bildik. Bizdiń agenttikte Qazaqstannyń fotoepopeıasyn jasaǵan óz isiniń has sheberleri ár jyldary jumys jasady. Olar: Anatolıı Ýstınenko, ıÝrıı Bekker, Iosıf Býdnevıch, Erkebulan Nurjanov, Mıhaıl Chýmın, Nıkolaı Kýznetsov, Valerıı Shıpýlın. Fotografııa salasynyń metri Aleksandr Pavskıı agenttikte qyzmetin jalǵastyryp kele jatsa, Muhtar Holdorbekov pen Vıktor Fedıýnın - agenttiktiń búgingi fotoshejiresin jasaýshylar. Qurmetti oqyrman, QazAqparattyń SÓZІ - sizdiń sózińiz, onyń TURAQTY USTANYMY, SENІMDІ QYZMETІ qashan da el paıdasyna jaraýǵa ázir. QazAqparat - qarapaıym qyzmetshi men saıası bıliktiń altyn kópiri. Sóz sońynda, «Myń estigennen bir kórgen artyq» degendeı, agenttik fototilshileri ár jyldary túsirgen FOTOREPORTAJYMYZDY nazarlaryńyzǵa usynamyz.
«QazAqparattyń» búgingi qýanyshy barshamyzǵa qutty bolsyn! «QazAqparat» HAA nazaryndaǵy QAZAQSTAN (FOTO)
Almas MUQAShULY
