Sharshy alańǵa qaıta oralǵan I.Dychko alǵashqy jekpe-jegin jeńispen aıaqtady
ASTANA. QazAqparat - Tashkentte ótip jatqan Sıdneı Djeksondy eske alýǵa arnalǵan bokstan halyqaralyq týrnırda Qazaqstan boksshysy Ivan Dychko jartylaı fınalǵa shyqty. Bul onyń Almatyda ótken álem chempıonatynan keıingi sharshy alańǵa alǵash kóterilýi, dep habarlady QR Boks federatsııasynyń baspasóz qyzmetinen.
Baıraqty básekeni shırek fınaldyq kezdesýden bastaǵan boksshymyz ázerbaıjandyq qarsylasy Asef Aslanlydan aılasyn asyrdy. Alǵashqy kezdesýinde qarsylasynan óz basymdyǵyn barlyq tóreshilerge moıyndatqan I.Dychko jartylaı aınalymda ózbekstandyq Bahodyr Djalolovpen qolǵap túıistiredi.
Aıta keterligi, I.Dychko - Djekson týrnırinde óner kórsetip jatqan Qazaqstan quramasynan jartylaı fınalǵa shyqqan jalǵyz sportshy. Buǵan deıin Tashkentegi jarys jolyn Zákir Safıýllın, Almasbek Orynǵalıev, Saparbaı Aıdarov jáne Nurdáýlet Jarmanov aıaqtaǵan bolatyn.
Eske sala keteıik, Londondaǵy Olımpıadanyń qola júldegeri, aýyr salmaqtaǵy qazaqstandyq boksshy Ivan Dychko Almatydaǵy álem chempıonatynyń fınalynda Magomedrasýl Medjıdovten nokaýtpen jeńilgen bolatyn. Ol rıngten dárigerlerdiń kómegimen ketti. Sportshynyń babyna kelýi úshin bir jyldaı ýaqyt qajet boldy.
