Sharshasańyz kofe iship, azdap demalyńyz: Abaı oblysynda polıtsııa júrgizýshilerge aktsııa uıymdastyrdy
SEMEI. KAZINFORM - Júrgizýshilerdiń sharshaýynan bolatyn jol-kólik oqıǵalarynyń aldyn alýǵa baǵyttalǵan profılaktıkalyq aktsııa Abaı oblysynyń avtojoldarynda áli júrip jatyr, dep habarlaıdy Abaı oblysy Polıtsııa departamentiniń baspasóz qyzmeti.
Bul joly júrgizýshilerdi Borodýlıha aýdanynyń polıtsııa qyzmetkerleri qarsy aldy. Uzaq ýaqyt jolda bolǵandarǵa az ýaqyt aıaldap, demalý usynylyp, ystyq kofe men aýyz sý taratyldy. Polıtseıler júrgizýshilerdiń jaǵdaıyn surap, der kezinde demalýdyń mańyzdylyǵyn eske saldy.
Polıtsııanyń basty mindeti — jol qozǵalysy qaǵıdalarynyń saqtalýyn baqylaý ǵana emes, qaýipti jaǵdaıdy qaıǵyly oqıǵaǵa ulaspaı turyp aldyn alý.
Uzaq ári birsaryndy jol zeıindi tómendetedi: adamnyń reaktsııasy baıaýlap, uıqyshyldyq paıda bolady. Osyndaı sátte táýekelge barmaı, qaýipsiz jerge toqtap, demalý qajet.
Abaı oblysy Polıtsııa departamentiniń bastyǵy polıtsııa polkovnıgi Eldar Danııarovtyń tapsyrmasy boıynsha mundaı profılaktıkalyq jumys óńirdiń avtojoldarynda júrgizilip jatyr.
-Sharshaǵanyńyzdy sezseńiz — táýekelge barmańyz. Qaýipsiz jerge toqtap, demalyńyz. Keıde birneshe mınýttyq úzilis pen bir shyny ystyq kofe joldy qaýipsiz jalǵastyrýǵa múmkindik beredi,-deıdi polıtsııa qyzmetkerleri.
Aktsııa áli júryp jatyr. Basty maqsat — árbir júrgizýshi men jolaýshynyń dittegen jerine aman-esen jetýi.
Osyǵan deıin Qazaqstandaǵy jol apattarynyń 91%-y júrgizýshilerdiń kinásinen bolatyny týraly jazdyq.
