Sharmanovtyń uly Astanadaǵy ýnıversıtetke ákesiniń esimi berilýine baılanysty Prezıdentke alǵys aıtty
ASTANA. KAZINFORM — Astana medıtsına ýnıversıteti jańa oqý jylyn erekshe mártebemen bastamaq. Endi elimizdegi jetekshi medıtsınalyq bilim ordasy Ulttyq joǵary oqý orny mártebesine ıe bolady. Sonymen qatar, ýnıversıtetke belgili ǵalym, akademık, Qazaqstannyń Eńbek Eri Tóregeldi Sharmanovtyń esimi beriledi.
Bul bastama Memleket basshysy Qasym-Jomart Toqaevtyń tapsyrmasyna sáıkes júzege asyp otyr. Ýnıversıtettiń Ulttyq mártebe alýy bilim berý sapasyn arttyrýǵa, ǵylymı-zertteý áleýetin kúsheıtýge jáne halyqaralyq yntymaqtastyqty keńeıtýge múmkindik beredi. Ásirese bolashaq dárigerler úshin bul jańalyqtyń mańyzy zor. Stýdentterdiń aıtýynsha, jańa mártebe sheteldik joǵary oqý oryndarymen tájirıbe almasýǵa jol ashyp, kásibı damýǵa serpin beredi.
— Ýnıversıtetimizge Tóregeldi Sharmanovtyń esiminiń berilýi — úlken mártebe. Ol nýtrıtsıologııa ǵylymynyń negizin qalaǵan, densaýlyq saqtaý salasynyń damýyna zor úles qosqan tulǵa. Endigi mindetimiz — osy atqa laıyq bolý. Ulttyq mártebe alǵannan keıin sheteldik joǵary oqý oryndarymen baılanys ornatýǵa múmkindigimiz artady, — dedi stýdent Hýseın Pashaev.
Tóregeldi Sharmanov — Qazaqstan medıtsınasynyń damýyna aıryqsha eńbek sińirgen ǵalym. Ol tamaqtaný ǵylymy men qoǵamdyq densaýlyq saqtaý salasynyń qalyptasýyna zor úles qosty. Sondaı-aq, 1978 jylǵy Almaty deklaratsııasyn ázirleýge atsalysqan tulǵalardyń biri boldy. Bul qujat álem elderi úshin alǵashqy medıtsınalyq kómektiń qoljetimdi bolýy men densaýlyq saqtaý quqyǵyn qamtamasyz etýdiń mańyzdy qaǵıdattaryn aıqyndaǵan tarıhı qujat sanalady.
Ǵalymnyń uly, Profılaktıkalyq medıtsına akademııasynyń prezıdenti Almaz Sharman ákesiniń el medıtsınasyna qosqan úlesi men ǵylymdaǵy eńbegin erekshe atap ótti. Onyń aıtýynsha, toqyraý jyldary akademık sheteldik seriktestermen birlesip, Qazaqstanǵa ıod jáne temir qospalary bar ónimderdi jetkizýge yqpal etken. Keıin bul bastamalar halyq tutynatyn un men tuzdy baıytý isine negiz boldy.
— Eń aldymen, Prezıdent Qasym-Jomart Kemeluly Toqaevqa Astana medıtsına ýnıversıtetine ákemniń esimi berilýine baılanysty alǵysymdy bildiremin. 2022 jyly Memleket basshysy ákeme «Qazaqstannyń Eńbek Eri» ataǵyn berdi. Meniń oıymsha, bul — laıyqty marapat ári Prezıdenttiń ǵylymǵa kórsetken qurmetiniń belgisi, — dedi Almaz Sharman.
Ýnıversıtet basshylyǵy jańa mártebe oqý ornyna úlken múmkindikpen qatar zor jaýapkershilik júkteıtinin aıtady. Aldaǵy ýaqytta bilim ordasynda jańa bilim berý baǵdarlamalary engizilip, halyqaralyq seriktestik jobalary keńeıtiledi. Sonymen qatar, medıtsına salasyna qajet ǵylymı jáne pedagogıkalyq kadrlardy daıarlaý jumysy kúsheıtiledi.
— Bul — biz úshin úlken jaýapkershilik. Qazir ýnıversıtettiń jańa strategııalyq josparyn ázirlep jatyrmyz. Basty maqsatymyz — medıtsınalyq bilim berý, zamanaýı tehnologııalar men ǵylymdy toǵystyrǵan jetekshi ortalyqqa aınalý, — dedi ýnıversıtet rektory Anar Turmuhambetova.
Qazir Astana medıtsına ýnıversıtetinde álemniń birneshe elinen kelgen 11 myńǵa jýyq stýdent bilim alady. Jyl saıyn oqý ornyn shamamen 3 myń jas maman támamdaıdy. Ulttyq joǵary oqý orny mártebesi men Tóregeldi Sharmanov esiminiń berilýi ýnıversıtettiń el medıtsınasy men ǵylymyndaǵy ornyn odan ári aıqyndaı túspek.
Eske salaıyq, buǵan deıin Astana medıtsına ýnıversıtetine Tóregeldi Sharmanovtyń esimi beriletinin habarlaǵanbyz.
