Sharm-esh-Sheıh áýejaıyndaǵy tragedııa: Oqıǵaǵa qatysty sońǵy derekter málim boldy
ASTANA. KAZINFORM - Mysyrdyń Azamattyq avıatsııa mınıstrligi Kazinform agenttiginiń resmı saýalyna joldaǵan jaýabynda Sharm-esh-Sheıh halyqaralyq áýejaıynda bolǵan oqıǵaǵa resmı túsinik berdi.
Oqıǵa qalaı boldy ?
Oqıǵa bylaı bolǵan: Sharm-esh-Sheıh halyqaralyq áýejaıynyń №2 ushý zalynda Al-Ahram Advertising Agency jarnama agenttigine tıesili jarnamalyq taqtaısha kenet qulap túsken. Oqıǵa saldarynan Astanaǵa ushatyn SCAT Airlines áýe kompanııasynyń DV 2570 reısin kútip otyrǵan úsh jolaýshy — Qazaqstan Respýblıkasynyń azamattary (úsheýi de áıel adam – red.) jaraqat aldy. Oqıǵa ornyna shuǵyl túrde qutqarýshylar kelip, zardap shekkenderge alǵashqy medıtsınalyq kómek kórsetti.
Zardap shekkender men marqumnyń otbasyna qandaı kómek kórsetildi ?
Barlyq zardap shekken adamdarǵa jedel túrde medıtsınalyq kómek kórsetildi. Ókinishke qaraı, áıelderdiń biri alǵan jaraqatynan Sharm-esh-Sheıh halyqaralyq aýrýhanasynda qaıtys boldy. Qalǵan eki jolaýshy aýrýhanaǵa jatqyzyldy, olardyń jaǵdaıy turaqty qalypty.
Zardap shekken áıeldiń biri men onyń qyzyna qonaqúıden bólme berildi, tolyq logıstıkalyq qoldaý kórsetildi. Qaza tapqan áıeldiń uly da jatyn orynmen qamtamasyz etildi. Qazaqstan Elshiligimen barlyq qajetti konsýldyq, quqyqtyq jáne gýmanıtarlyq kómekter kórsetý boıynsha jumys júrgizilip jatyr.
Tergeý júrgizilip jatyr ma ?
Oqıǵa týraly aqparat birden prokýratýra organdaryna joldandy. Resmı túrde qylmystyq tergeý bastaldy. Áýejaı ákimshiligi men jarnama agenttiginiń ókilderi jan-jaqty jáne ashyq tergeý júrýi úshin quqyq qorǵaý organdarymen yntymaqtasa iske atsalysyp jatyr.
Jaýapty tulǵalar anyqtalyp, qoldanystaǵy zańnamaǵa sáıkes jaýapqa tartylady.
Mınıstrlik sondaı-aq, tergeý amaldary jalǵasyp jatqandyqtan, beınebaqylaý kameralaryndaǵy jazbalar nemese resmı vızýaldy qujattar tek tergeý organdarynyń sheshimimen ǵana jarııa etilýi múmkin ekenin atap ótti. Ruqsat alynǵan jaǵdaıda, materıaldar zańda belgilengen rásimderge jáne múddeli taraptarmen kelisim boıynsha BAQ-qa beriledi.
Esterińizge sala keteıik, buǵan deıin Sharm-esh-Sheıh áýejaıynda úsh qazaqstandyq azamattyń ústine jarnama taqtasy qulaǵanyn jazǵan edik.