Sharm-esh-Sheıh áýejaıynda úsh qazaqstandyqqa jarnama taqtasy qulady
ASTANA. KAZINFORM - Sharm-esh-Sheıh áýejaıynda Astanaǵa deıin baratyn DV5270 reısine otyrar kezde úsh qazaqstandyq áıelge jarnama taqtasy qulady.
QR Syrtqy ister mınıstrligi baspasóz qyzmetiniń habarlaýynsha, keshe Sharm-esh-Sheıh áýejaıynda reısti kútip turǵan jolaýshylar turǵan aýmaqta jarnama taqtasy qulady. Oqıǵanyń saldarynan qazaqstandyq áıel mert boldy, taǵy eki otandasymyz jaraqat aldy.
- Mert bolǵan adamnyń týystarymen baılanysqa shyqtyq, olarǵa barlyq másele boıynsha konsýl kómek kórsetip jatyr. Zardap shekken eki áıelge qajetti medıtsınalyq kómek kórsetildi, olardyń densaýlyǵyna qaýip tónip turǵan joq. Mysyr tarapy qaıǵyly oqıǵaǵa baılanysty kóńil aıtyp, shyn júrekten ókinish bildirdi. Mysyrdyń azamattyq avıatsııa mınıstri bolǵan oqıǵany óziniń jeke baqylaýyna alyp, birden arnaıy komıssııa jiberdi, - dep málimdedi vedomstvo ókilderi.
Qazir oqıǵa ornynda tergeý jumystary júrip jatyr. QR Elshiligi atalǵan jaǵdaıdy jeke baqylaýyna aldy.
Eske salsaq, buǵan deıin Taılandta ıahta órtenip, ondaǵy jolaýshylar arasynda Qazaqstannyń 4 azamaty bolǵany habarlanǵan edi. Eki azamattyń pasporty órtenip ketken. Elimizdiń Syrtqy ister mınıstrligi olardyń qujattary retteletinin málim etti.