Sharm-esh-Sheıhte kóz jumǵan áıeldiń jan qurbysy deneni Aqtóbege jetkizýge kómek suraıdy
AQTÓBE. KAZINFORM - Sharm-esh-Sheıh áýejaıynda kóz jumǵan Aqmaral Muqanovanyń jan qurbysy Venera Iskakova marqumnyń denesin elge, Aqtóbe qalasyna jetkizý úshin kómek suraıdy.
Aqtóbe oblystyq PD kadr basqarmasynda uzaq jyl jumys istegen Aqmaral Muqanova úsh jyl buryn ǵana Astanadaǵy balasynyń janyna qonys aýdarǵan.
— Qaıtys bolǵan Aqmaral Muqanova meniń jan qurbym. 1970 jyly Baıǵanın aýdanyndaǵy Qaraýylkeldi orta mektebine birinshi synypqa baryp, sodan beri qurbymyz. 1980 jyly oqý bitirip Almatyǵa ketti. Taldyqorǵanda zańgerlik mamandyqty meńgerdi. Aqtóbedegi Sazdy polıtsııa bóliminde qyzmet jolyn bastady. Aqtóbe qalalyq polıtsııa basqarmasynan zeınetke shyqty. Keshegi bolǵan jaǵdaıdy men balasynan estidim. Saǵat 12:00 shamasynda áleýmettik jeli arqyly kórip, Aqmaralǵa habarlasam dep oıladym. Umytyp ketippin. Bir kezde balasy «Anamnan aıyrylyp qaldym» dep jazypty. Buǵan deıin ol jaqqa barǵanyn estip, habarlasyp otyrdym. Habarlama jazyp, fotosyn da jibergen edi. Balasy janynda Elshilikten adam bar ekenin, denesin 3-4 kún kútetinin, tergeý júrip jatqanyn aıtty, — dedi Venera Iskakova.
Aıtýynsha, Aqmaral Muqanova ulymen saıahattaǵandy unatatyn. Mysyrǵa sapar da - sondaı saıahattyń biri edi.
— Únemi kúlimdep júrdi, bir renjigenin kórmedim. Balasy ekeýi jıi saıahattady, bul da kezekti saıahat boldy. Sońǵy ret sáýirde kórdim. Ol telefon qýattaımyn dep turǵan, taqtaı sol sátte qulaǵan eken. Іs durys tergelmeı qala ma dep te alańdaımyz. Men qazir balanyń jaǵdaıyn oılap otyrmyn. Marqumnyń denesin elge, Aqtóbege jetkizse deımiz. Ol Aqtóbede turdy. Astanaǵa kóshkenine 3 jyl ǵana boldy. Deneni Qazaqstanǵa ákelý úshin Prezıdentten, Úkimetten, Elshilikten kómek suraımyz, — dedi qurbysy.
Eske salsaq, Sharm-esh-Sheıh áýejaıynda Astanaǵa deıin baratyn DV5270 reısine otyrar kezde úsh qazaqstandyq áıelge jarnama taqtasy qulady. Oqıǵanyń saldarynan qazaqstandyq áıel mert boldy, taǵy eki otandasymyz jaraqat aldy.
Qaza tapqan áıeldiń uly da jatyn orynmen qamtamasyz etildi. Qazaqstan elshiligimen barlyq qajetti konsýldyq, quqyqtyq jáne gýmanıtarlyq kómekter kórsetý boıynsha jumys istelip jatyr.
Marqum Aqmaral Muqanovanyń áriptesteri onyń ashyq-jarqyn, meıirimdi jan ekenin aıtty.