Sharlapaev ýtıl alymyna qarsy talqylaý jaıynda: Bizge shoý kerek emes
ASTANA. KAZINFORM — Ónerkásip jáne qurylys mınıstri Qanat Sharlapaev ýtıl alymyna qarsy onlaın petıtsııa talaptaryn talqylaýǵa arnalǵan jumys toby jaıynda pikir bildirdi.
«Atalǵan petıtsııa boıynsha sońǵy sheshim shyǵarýǵa áli erterek. Sebebi jumys tobynyń otyrysy ótýi kerek. Alaıda jumys tobynyń birinshi otyrysy ótpeı qaldy. Petıtsııany jazǵan adamdar mınıstrlikke kire almaǵan edi, ıaǵnı ǵımaratqa telefonmen kirýge bolmaıdy. Búgin jumys tobynyń otyrysyn ótkizemiz», — dedi Qanat Sharlapaev Senattyń jalpy otyrysynan keıin tilshiler suraǵyna jaýap bere otyryp.
Bul turǵyda tilshiler atalǵan jumys tobynyń otyrysyn el halqy kútip otyrǵanyn aıta kele, telefon kirgizý múmkindigi týraly surady.
«Meniń oıymsha, qazir naqty dıalog kerek, ıaǵnı shoý qajet emes. Myna jumysty shoý úshin jasaımyz ba?! Jalpy, atalǵan otyrysta beınejazba jasalady. Onda jazylǵan vıdeony tolyqtaı keıinnen beremiz. Petıtsııany zań aıasynda talqylaýymyz kerek jáne ony talqylaýǵa múmkindik jasalyp otyr. Osy jumys tobynda jazylǵan vıdeony tolyq nusqada petıtsııany jazǵan adamdarǵa beremiz», — dedi mınıstr.
Eske sala keteıik, taıaýda ýtıl alymyna qarsy petıtsııa 50 myń qol jınady, endi ony Úkimet qaraýy kerek.
Bıyl 6 maýsymda ýtıl alymy týraly petıtsııany qaraıtyn jumys tobynyń otyrysy ótýge tıis edi. Alaıda jıynǵa belsendilerdi telefonmen kirgizbeı qoıǵan.
