Sháripova-Valstrem aıqasy qazaqstandyq sportshynyń jaraqatynan keıinge shegerildi

ALMATY. QazAqparat - Kásibı boksta birneshe salmaq sanatynda chempıondyq beldikterdiń ıesi, qazaqstandyq Fırýza Sháripova fın sportshysy Eva Valstremmen aıqasqa daıyndyq kezinde jaraqat aldy. Bul týraly qazaqstandyq sportshynyń baspasóz qyzmetinen málim etti, dep habarlaıdy QazAqparat tilshisi.

Dárigerler onyń tolyq aıyǵýyna bir aıǵa jýyq ýaqyt qajettigin aıtýda.  Bul jaǵdaıǵa qatysty Sháripovanyń menedjeri Sergeı Zavıleıskıı pikir bildirdi.

«Fırýza jaraqattansa da, aıqasýǵa daıyn boldy. Biraq, bul jekpe-jektiń deńgeıi joǵary, sondyqtan oǵan ruqsat bermedik. Biz jattyǵý shtabymen birge aıqasty keıinge qaldyrý sheshimin qabyldadyq. Fırýzanyń densaýlyǵyn saqtap qalý úshin dárigerlerdiń keńesine qulaq asatyn bolamyz. Boks uıymynyń eń bedeldi tıtýlyn ıemdený múmkindigin jiberip alǵymyz kelmeıdi. Biz Eva Valstremnyń komandasyna habarladyq, endi aıqastyń jańa datasyn talqylaımyz. Oǵan daıyndyq protsesiniń ishinara ótemaqysyn tóleý týraly usynyspen shyǵýǵa daıynbyz. Ol bul ýaqytta aralyq jekpe-jek ótkizbeıdi dep úmittenemiz», - dedi Sergeı Zavıleıskıı.

Eske salaıyq, Fırýza Sháripovanyń WBC tujyrymy boıynsha álem chempıony tıtýly jáne IBO Championship belbeýi úshin Eva Valstremmen aıqasy 22 jeltoqsanda Sankt-Peterbýrgte ótýi tıis edi.