Sharyn shatqalynda Qyzyl kitaptaǵy sabanshy vıdeoǵa túsip qaldy
ALMATY. KAZINFORM — Sharyn memlekettik ulttyq tabıǵı parkiniń resmı paraqshasynda sabanshy (manýl) men onyń kúshigi túsirilgen kadrlar jarııalandy.
Erekshe vıdeo shatqal aýmaǵyndaǵy jabaıy janýarlardy josparly baqylaý kezinde túsirilgen.
Park mamandarynyń aıtýynsha, vıdeo tabıǵattaǵy monıtorıng kezinde alynǵan. Kadrlarda eresek sabanshy áýeli aınalany asa saqtyqpen sholyp shyǵyp, qaýip joq ekenine kóz jetkizedi.
Osydan keıin tastardyń arasynan onyń kúshigi shyǵyp, enesine qaraı bet alady.
— Vıdeoǵa jabaıy tabıǵattaǵy eń sırek ári áserli sátterdiń biri — sabanshynyń kúshigimen qaýyshýy túsip qaldy, — delingen ulttyq park taratqan aqparatta.
Mamandar sabanshy mysyq tuqymdasynyń eń saq ári kózge túse bermeıtin ókilderiniń biri dep sıpattaıdy. Olar kóbine jeke tirshilik etedi, adamnan boıyn aýlaq ustaıdy jáne ásirese tóldeý kezeńinde kózge óte sırek shalynady.
— Sabanshyny tabıǵatta kórýdiń ózi — neken-saıaq jaǵdaı. Al onyń kúshigimen birge túsýi — ǵylym úshin asa qundy tabys, — deıdi park qyzmetkerleri.
Ulttyq park ókilderi analyq sabanshynyń kúshigimen birge júrýi óńir ekojúıesiniń turaqty ekenin jáne sırek janýarlardyń kóbeıýine jaǵdaı baryn ańǵartatynyn atap ótti. Qazaqstanda sabanshy Qyzyl kitapqa engizilgen jáne memleket qorǵaýynda.
Eske salaıyq, munyń aldynda Almaty zoobaǵy Ońtústik Amerıkadan kelgen erekshe janýarmen tolyqqanyn habarlaǵan edik.