Sharyn shatqaly, Qapshaǵaı men Kólsaı: Almaty oblysynda taǵy qandaı tyń týrıstik jobalar iske asyrylmaq

ASTANA. KAZINFORM – Almaty oblysynyń ákimi Marat Sultanǵazıev óńirde qandaı tyń týrıstik jobalardyń iske asyrylyp jatqanyn aıtty.

Búgin Úkimet otyrysynda Premer-Mınıstr Oljas Bektenov Almaty oblysy ákiminen: «Jyl saıyn myńdaǵan týrıst Sharyn shatqalyna, Qapshaǵaı men Kólsaıǵa saıahattap barady. Qazir bul jerler elimizdiń eń tanymal oryndaryna aınaldy. Taǵy qandaı tyń jobalardy iske asyrý josparda bar?», - dep suraǵan edi.

Marat Sultanǵazıevtyń aıtýynsha, óńirde týrısterdi keńinen tartý maqsatynda birqatar ınvestıtsııalyq joba iske asyrylyp jatyr.

«Atap aıtqanda, Sharyn parkinde Vızıt ortalyq ashylyp, bıyl glempıkterdiń sanyn arttyrý josparlanǵan. Іle Alataýy aýmaǵynda 2 vızıt ortalyq ashyldy. Kólsaı kólderinde taýly soqpaqtar men marshrýttar abattandyryldy. Sondaı-aq Qapshaǵaı sý qoımasynyń jaǵalaýynda jeke ınvestıtsııa esebinen birneshe keshen iske qosyldy. Osy jumystardyń nátıjesinde byltyr atalǵan salaǵa 60 mlrd teńge ınvestıtsııa salyndy. Bıyl Qapshaǵaı-Resort demalys kesheni, «Sokol» avtodromy, «Kóktal» taý kesheni jáne OBLOKO Country club demalys aımaǵy sııaqty iri jobalar iske asyrylýda. Sonymen qatar «Oıqaraǵaı» ınvestıtsııalyq tobymen memorandým jasalyp, 2028 jylǵa deıin 500 jańa jumys orny qurylyp, 58 mlrd teńge ınvestıtsııa tartylady», - dedi ol

Onyń atap ótýinshe, týrıstendirý kartasyna kiretin 33 aýmaqtyń 9-y Almaty oblysynda ornalasqan. Olardy damytý boıynsha keshendi sharalar qabyldanyp, oń ımıdj qalyptastyrýǵa baǵyttalǵan marketıngtik is-sharalar uıymdastyrylyp jatyr.