Sharyn parkinde qaraquıryqtar fototuzaqqa túsip qaldy
ASTANA. KAZINFORM - Sharyn memlekettik ulttyq tabıǵı parkinde ornatylǵan fototuzaq jabaıy tabıǵattyń erekshe sátin tirkedi — kamera obektıvine Qazaqstannyń Qyzyl kitabyna engizilgen qaraquıryqtar tústi, dep habarlaıdy QR Ekologııa mınıstrliginiń baspasóz qyzmeti.
Qaraquıryq — elimizdiń erekshe qorǵaýǵa alynǵan janýarlarynyń biri. Sondyqtan ony tabıǵı mekeninde osylaı erkin júrgen kúıinde baqylaý — mamandar úshin qundy derek, al biz úshin jabaıy tabıǵattyń kózge kórine bermeıtin tirshiligine úńilýdiń tamasha múmkindigi.
Adamnyń qatysýynsyz jumys isteıtin fototuzaqtar janýarlardy tabıǵı minez-qulqyna kedergi keltirmeı baqylaýǵa múmkindik beredi. Osyndaı kadrlar arqyly mamandar jabaıy janýarlardyń tirshiligin qadaǵalap, tabıǵı aýmaqtaǵy jaǵdaıdy zertteıdi.
Eń qundysy — bul arnaıy qoıylǵan kórinis emes. Qaraquıryqtar óz mekeninde erkin júr, al kamera olardyń kúndelikti tirshiliginiń bir sátin ǵana únsiz «ustap» qaldy.
-Tabıǵat biz kórmegen kezde de óz tirshiligin jalǵastyra beredi. Al fototuzaqtar sol qupııa álemniń bir sátine kóz júgirtýge múmkindik beredi,- deıdi mamandar.
Osyǵan deıin Іle Alataýynda gımalaı ulary fototuzaqqa túsip qalǵany týraly jazdyq.
