Tájikstanda bank kartalaryn bógde adamdarǵa bergeni úshin ákimshilik jaýapkershilik engizildi
ASTANA. KAZINFORM — Tájikstanda tólem kartalary men elektrondy ámııandardy, sondaı-aq olardyń derekterin paıdakúnemdik maqsatta zańsyz bergeni, satqany jáne taratqany úshin ákimshilik jaýapkershilik engizildi, dep habarlaıdy Kazinform agenttiginiń Dýshanbedegi menshikti tilshisi.
Tájikstan ІІM astanalyq basqarmasynyń málimetinshe, 2026 jylǵy 21 qazanda eldiń Ákimshilik quqyq buzýshylyq týraly kodeksine «Elektrondy tólem quraldarynyń zańsyz aınalymy» týraly tolyqtyrý engizildi. https://t.me/dushanbe_police_tj/7989 Bul túzetýdi ázirleý barysynda Reseı, Qazaqstan jáne Belarýs tájirıbesi eskerilgen.
Quqyq buzýshylarǵa zańsyz aınalymdaǵy zattardy tárkileı otyryp, aıyppul salynady. Onyń mólsheri jaza qoldanatyn organǵa qaraı 10-nan 85 eseptik kórsetkishke deıin belgilenedi. Al bir jyl ishinde osy áreketke qaıta barǵandarǵa 30-dan 85 eseptik kórsetkishke deıin aıyppul qarastyrylǵan.
Astanalyq polıtsııa turǵyndarǵa SIM-kartalaryn, tólem kartalaryn, elektrondy ámııandaryn jáne olarǵa qatysty málimetterdi bógde adamdardyń qolyna bermeýdi eskertti. Polıtsııa mundaı tólem quraldary arqyly qylmys jasalǵan jaǵdaıda, jaýapkershilik kúsheıtiletinin habarlady.
Buǵan deıin Tájikstan Іshki ister mınıstrligi balgerler, sıqyrshylar, jezóksheler, nashaqorlar jáne alaıaqtyq áreketterge qatysy bar basqa da tulǵalar týraly aqparatty qamtıtyn arnaıy derekqor quryp jatqany habarlanǵan bolatyn.