Sharyn álemniń úzdik 20 shatqalynyń qataryna endi
ASTANA. KAZINFORM — Álemge áıgili Sharyn shatqaly halyqaralyq The Worldworthy 100 reıtınginiń 2026 jylǵy shyǵarylymynda álemdegi eń úzdik 100 kanon men shatqaldyń qataryna kirdi.
Orman sharýashylyǵy jáne janýarlar dúnıesi komıteti baspasóz qyzmetiniń málimetinshe, Sharyn shatqaly álem boıynsha — 17-orynǵa, Qazaqstan boıynsha — 1-orynǵa turaqtaǵan.
Mıllıondaǵan jyldar boıy qalyptasqan ǵajaıyp jartastar, erekshe geologııalyq qurylymdar men qaıtalanbas tabıǵat kórinisteri arqyly tanylǵan Sharyn shatqaly halyqaralyq reıtıngte joǵary baǵalandy.
Worldworthy 100 — kelýshilerdiń pikirleri men usynystaryn, jýrnalıstik zertteýlerdi jáne ashyq derekkózderdegi málimetterdi eskere otyryp jasalatyn táýelsiz redaktsııalyq reıtıng. 2026 jylǵy kanondar men shatqaldar tizimine 46 elden 100 nysan engizilgen.
— Worldworthy redaktsııasy «Sharyn» memlekettik ulttyq tabıǵı parkine reıtıng laýreatynyń arnaıy sertıfıkatyn joldady. Bul — Qazaqstannyń biregeı tabıǵı murasyn álemge tanytatyn qýanyshty jańalyq ári ony saqtaý jolynda eńbek etip júrgen tabıǵat qorǵaýshylary úshin erekshe mártebe! — delingen vedomstvo habarlamasynda.
Osyǵan deıin Sharyn ulttyq parkinde sırek kezdesetin ózen kámshaty fototuzaqqa túskenin jazǵan edik.
