Sharıǵat shálisin jamylǵan reperdiń ataǵy aspandap tur
ASTANA. 6 jeltoqsan. QazAqparat - Rep kompozıtsııalaryn oryndap júrgen Maıam Mahmud esimdi mysyrlyq boıjetken ózine aıtylǵan syn men taǵylǵan minge toıtarys berý úshin aqtalyp álek.
«Arabs Got Talent» dep atalatyn arab tilinde ótken shoýmenderdiń baıqaýyna qatysqaly beri Maıamnan maza qashty. Onyń Facebook áleýmettik jelisindegi paraqshasyna talantyna tabynýshylardan kúnine 50-ge jýyq hat kelip túsedi. Olardyń kóbisi talanty tas jarǵan ánshige qoldaý kórsetkenimen, 18 jastaǵy boıjetkenniń sharıǵat sheńberinen shyǵyp, sahnada óner kórsetkenine narazylyq bildirgender de bar, dep jazady muslim.kz.
Ol sharıǵat shálisin jamylyp, rep kompozıtsııalaryn oryndap júrgen ánshilerdiń alǵashqysy emes. Alaıda, «Arabs Got Talent» baıqaýy onyń ataǵyn alysqa shyǵaryp, dańqyn asyrǵan shara boldy.
Musylman boıjetkenniń sózine qaraǵanda, onyń bul qadamy, ásirese, erlerdiń narazylyǵyn týdyrǵan eken.
Maıam Mahmud batystyń rep ánderinen boıyn aýlaq ustaıdy. Onyń shyǵarmashylyǵyna jastaıynan óleń-jyrǵa baýlyǵan anasy dem beretin kórinedi.
