Shardjadan attanǵan reıs qazaqstandyqtardy alyp Almatyǵa ushty

«Qazaqstan Respýblıkasynyń Investıtsııalar jáne damý mınıstrliginiń Týrızm ındýstrııasy jáne jedel shtaby departamenti óz jumysyn táýlik boıy úzdiksiz jalǵastyrýda. Air Arabia áýe kompanııasynyń Shardja - Almaty reısimen qazaqstandyq jolaýshylar Shardja qalasynyń áýejaıynan búgin jergilikti ýaqytpen saǵat 10:30-da ushty. Air Arabia aqparatyna súıensek, Astanaǵa reıs búgin bolmaıdy. Astanaǵa qaıtatyn qazaqstandyq týrıster atalmysh reıspen ushty. Áýe kompanııasynyń erteńgi reısteri keste boıynsha júrgiziledi», - dep jazdy Investıtsııalar jáne damý mınıstrliginiń Týrızm ındýstrııasy departamentiniń dırektory Marat Iǵalı Feısbýktaǵy paraqshasyna.

«Flydubai» áýe kompanııasynyń málimeti boıynsha, Dýbaıdaǵy jáne Qazaqstan Respýblıkasynyń basqa qalalarynyń jolaýshylary qonaq úılerge ornalastyryldy. Áýe kompanııasynyń 2017 jyldyń 1 qańtaryndaǵy reısi keste boıynsha ushty. 2016 jyldyń 31 jeltoqsanynda usha almaı qalǵan keıbir jolaýshylardy osy ushaqqa otyrǵyzdy. Áýe kompanııasynyń ókilderi qazaqstandyq týroperatorlarmen táýlik boıy úzdiksiz baılanysqa shyǵyp otyr. 2016 jyldyń 31 jeltoqsanynda usha almaı qalǵan týrısterdi áýe kompanııasy jaqyn reısterge otyrǵyzady nemese qarajattaryn tolyqtaı qaıtarady.

Buryn aýa raıy qolaısyzdyǵyna baılanysty Shardja qalasynyń áýejaıyndaǵy barlyq reısterge shekteý qoıyldy. Birneshe kún boıy qoıý tuman ornap, ushaqtar basqa elderge usha almady jáne qona almady. Osyǵan baılanysty kóptegen qazaqstandyq týrıster Shardja áýejaıynda bógelip qaldy.