Shardjada apaly-sińlili eki qyz qaza tapty: SІM mán-jaıdy anyqtaýǵa kiristi
ASTANA. KAZINFORM — Birikken Arab Ámirlikteriniń Shardja qalasynda bir úıdiń eki qyzy qaza tapty. QR Syrtqy ister mınıstrligi qajetti kómek kórsetip jatyr.
Buǵan deıin áleýmettik jelide qaza tapqan qyzdardyń máıitin elge qaıtarý úshin kómek suraǵan jazbalar jarııalanǵan edi.
— QR Syrtqy ister mınıstrligi Shardja qalasynda (BAÁ) qaza bolǵan Qazaqstan Respýblıkasynyń azamattary Aqjan Bohanova men Juldyz Bohanovanyń týǵan-týystary men jaqyndaryna qaıǵylaryna ortaqtasyp, kóńil aıtady. Qazaqstan Respýblıkasynyń Dýbaı qalasyndaǵy Bas konsýldyǵy qajetti konsýldyq-quqyqtyq kómek kórsetip jatyr, onyń ishinde tıisti qujattardy rásimdeýge jáne Qazaqstan azamattarynyń qaza bolý mán-jaılaryna qatysty Ámirlikterdiń quzyretti organdarymen ózara is-qımyl jasaýǵa járdemdesip jatyr, — dep habarlady mınıstrliktiń baspasóz qyzmeti.
BAÁ-niń quzyretti organdary oqıǵanyń mán-jaılaryn anyqtap jatyr. Tergeý múddesine baılanysty qazirgi ýaqytta qosymsha aqparat jarııa etilmeıdi.
— QR SІM qaza bolǵandardyń otbasylarymen turaqty baılanysta jáne óz quzyreti sheńberinde olarǵa qajetti kómek kórsetip jatyr, — deıdi QR SІM.
Buǵan deıin Soltústik Kıprde pyshaq jaraqatyn alyp, aýrýhanaǵa túsken 22 jastaǵy boıjetkenniń Qazaqstan azamaty emestigi anyqtalǵan edi.
