Shardja áýejaıynda qalyp qoıǵan jolaýshylarǵa bılet quny tolyq óteledi
ASTANA. QazAqparat - Shardja áýejaıynda qalyp qoıǵan jolaýshylarǵa bılet quny tolyq óteledi. Bul týraly búgin Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Aýa raıynyń qolaısyzdyǵy, qalyń tuman men kóriný deńgeıiniń tómendigine baılanysty 2017 jyldyń 29, 30, 31 jeltoqsan kúnderi «Eır Arabııa» áýe kompanııasynyń Shardja-Astana-Shardja, Shardja-Almaty-Shardja baǵytyndaǵy reısi Shardja qalasynan jáne «Flaı Dýbaı» kompanııasynyń Dýbaı-Almaty-Dýbaı baǵytyndaǵy reısi Dýbaıdan ushyp shyǵa almady», - dedi ol.
Mınıstrdiń deregine sáıkes, ushaqtardyń kidirýi saldarynan Qazaqstanǵa kelmek bolǵan shamamen 500 jolaýshy zardap shekken.
«Oryn alǵan jaıtty sheshý úshin mınıstrlik mynadaı sharalar qabyldady: Syrtqy ister mınıstrligimen, áýe kompanııalarymen, áýejaılarmen, týrıstik operatorlarmen, qaýymdastyqtarmen birge jedel shtab quryldy. Biz kóshpeli týrızm salasynda qazaqstandyq azamattardyń quqyǵyna kepil beretin júıe mehanızmin iske qostyq. Biz qaýlyny jeltoqsan aıynyń basynda qabyldadyq jáne 31 jeltoqsanda «Týrıstik qamqor» korporatıvtik qorynyń kepilimen «Shardja-Astana-Shardja» baǵyty boıynsha qosymsha reıspen 300 adamdy shuǵyl elge jetkizýdi uıymdastyrdyq. Qalǵan jolaýshylar basqa áýe kompanııalarynyń, negizinen «Eır Astananyń» turaqty reısterimen jetkizildi», - dedi Qasymbek.
Ol áýejaıda kidirip qalǵan jolaýshylar qonaq úılerge ornalastyryp, tamaqpen qamtamasyz etilgendigin atap ótti.
«Áýe kompanııasynyń aqparaty boıynsha reısteri ushpaı qalǵan jolaýshylarǵa tarıftik tolyq somasy qaıtarylatyn bolady. Biz Ámirlikterdiń memlekettik organdaryna sáıkesinshe resmı nota jiberdik, «El Arabııa» áýe kompanııasy 23-24 kúnderine Astanaǵa shaqyryldy. Biz zardap shekken barlyq jolaýshylarǵa tarıf qunyn tolyq óteý boıynsha kelissóz júrgizemiz», - dedi ol.
