Shardj basshysy Mysyrda qaza bolǵandardyń otbasylaryna járdem retinde 2 mıllıon AQSh dollar kóleminde qarjy bóldi
ÁBÝ-DABI. 22 tamyz.QazAqparat - Birikke Arab Ámirlikteriniń joǵary keńesiniń múshesi, Shardj ámirliginiń basshysy sheıh Sultan bın Muhammed Ál Qasımı 2 mıllıon AQSh dollaryn Mysyrdaǵy saıası oqıǵalarda qaza bolǵandardyń otbasylaryna kómek kórsetý qoryna aýdardy.
«ONTV» Mysyr arnasynyń tańǵy shoý baǵdarlamasynyń júrgizýshimen telefon arqyly sóıleskende sheıh Sultan Ál Qasımı: «Mysyrdaǵy bolǵan jaǵdaılar qyryq jyl boıy ábden oılastyrylǵan qaskúnemdiktiń saldary. Onyń maqsaty - nadandyqty úgitteý, halyqty ashtyqqa ıtermeleý jáne biregeı Mysyr tarıhyn joıý». Efırdiń jalǵasynda Shardj basshysy Mysyr halqyn «óz revolıýtsııasyna berik bolýyn shaqyrdy, sebebi Mysyr varvarlyq shabýylǵa qarsy arab áleminiń qorǵanyshy». Óziniń sońǵy aıtqan sózderiniń astarynda doktor Sultan bın Muhammed Ál Qasımı Mysyrdaǵy «Musylman baýyrlar» qaýymdastyǵynyń saıası áreketin meńzegen bolý kerek.
Shardj ámiri mysyrdyń jańa bıligine Ámirlikter atynan qoldaý bildirdi. Sheıh Sultan sonymen qatar Sınaı túbegindegi Rafah shekaralas qalasynyń mańynda ornalasqan Mysyr aýyldarynda jańa meshitter qurylysyn qarjylandyrýǵa tapsyrma berdi. Musylman meshitterine osy aptanyń basynda lańkesterdiń jasaǵan shabýyldarynan qaza bolǵan 25 Mysyr soldattarynyń esimderi beriledi.
