Shardaranyń 32 myń turǵyny qaıtarylǵan aktıvter esebinen taza aýyz sýǵa qol jetkizdi
ASTANA. KAZINFORM – Túrkistan oblysynda zańsyz qaıtarylǵan aktıvter esebinen qarjylandyrylǵan Shardara toptyq sý qubyrynyń birinshi kezeńi iske qosylyp, qaladaǵy 32 myńǵa jýyq turǵyn sapaly aýyz sýmen qamtyldy. Bul týraly Túrkistan oblysynyń prokýratýrasy habarlady.
Vedomstvonyń málimetinshe, Arnaýly memlekettik qor esebinen óńirdegi 30 áleýmettik nysannyń qurylysyna 26,4 mlrd teńge bólingen. Búginde onyń 28-i paıdalanýǵa berilse, qalǵan eki jobany jyl sońyna deıin aıaqtaý josparlanyp otyr.
Óńirdegi eń iri jobalardyń biri – eldi mekenderdi sapaly aýyz sýmen qamtamasyz etýge baǵyttalǵan Shardara toptyq sý qubyrynyń qurylysy. Onyń birinshi kezeńine jalpy 16,5 mlrd teńge bólingen. Onyń ishinde 11,5 mlrd teńge respýblıkalyq bıýdjetten, 5 mlrd teńge Arnaýly memlekettik qordan qarjylandyrylǵan.
«Bólingen qarajat esebinen Tama ýchaskesinen sý qubyry tartylyp, sý sorý stantsııalary men sý tazartý qondyrǵylary ornatyldy. Sonyń nátıjesinde Shardara qalasynyń 32 myńǵa jýyq turǵyny sapaly aýyz sýǵa qol jetkizdi», – dep málimdedi oblys prokýratýrasy.
Prokýratýranyń málimetinshe, buǵan deıin, sońǵy 60 jyl boıy Shardara turǵyndary aýyz sýdy sý qoımasynyń ashyq kózinen paıdalanyp kelgen.
«Qaıtarylǵan aktıvter esebinen qarjylandyrylǵan jobalar óńirdiń áleýmettik ınfraqurylymyn damytýǵa jáne halyqtyń ómir sapasyn jaqsartýǵa eleýli úles qosyp otyr», – dep atap ótti vedomstvo.
Aıta keteıik, Aqtóbedegi jańa sý qubyryna qaıtarylǵan aktıvter esebinen 5 mlrd teńge bólindi.
