Shardaralyq turǵyn «Eńbek» baǵdarlamasynyń arqasynda kásibin ashty
ShARDARA. QazAqparat – Túrkistan oblysy, Shardara aýdanynyń turǵyny Baýyrjan Álipbaev «Ataýly áleýmettik kómek» jobasy aıasynda jeke kásibin ashty. Buǵan deıin egin sharýashylyǵymen aınalysqan ol búginde memlekettik baǵdarlamanyń arqasynda grant utyp alyp, dánekerleýshi jumysyn da qolǵa alǵan, dep habarlaıdy QazAqparat tilshisi.
Aýyl turǵyny tabysynyń az bolýyna baılanysty kópten beri oıdaǵy josparlaryn iske asyra almaı kele jatqanyn jáne qazir mol múmkindikke ıe bolǵanyn aıtady.
«Eńbek» baǵdarlamasymen 3 aı dánekerleýshi mamandyǵyn oqydym. Sosyn jańa kásip bastaýshy azamattarǵa arnalǵan grant arqyly 505 myń teńge utyp alyp, sol qarjyǵa dánekerleý isine qajetti qural-jabdyqtardy satyp aldym. Atap aıtqanda kempı, argon, ınvertorly metaldy balqytyp biriktiretin apparattaryn qoldanyp otyrmyn. Búginde aýylda synǵan kólikter men túrli tehnıkalardy jóndeýmen aınalysyp júrmin. Osyndaı is bastaýyma memlekettik baǵdarlamanyń kómegi mol boldy», – deıdi B.Álipbaev.
Shardaralyq turǵyn jańa is bastaǵaly tabysynyń eselep artqanyn aıtady. Endigi onyń jospary – qorǵanǵa arnalǵan qaqpa jasaıtyn tseh ashyp, kásibin keńeıtýdi kózdep otyr. Ol budan bólek, aýlasyndaǵy jylyjaıǵa qarbyz kóshetterin ósirip, satýmen de aınalysady.
Aıta keteıik, Shardara aýdany boıynsha ótken jyly 3559 otbasyǵa qarjylaı ataýly áleýmettik kómek berilgen. Onyń ishinde 2776-y iri qara malyn, 432 otbasy ýaq mal asyraýdy qolǵa alǵan. 54 januıa ártúrli baǵytta ózderiniń jeke kásipterin ashqan. Ataýly áleýmettik kómek alýshy otbasylardyń ishinen eńbekke qabiletti otbasy músheleri «Eńbek» baǵdarlamasynyń sheńberinde 84 adam qysqa merzimdi kásiptik oqýǵa, 50 adam áleýmettik jáne 19 adam qoǵamdyq jumysqa, 1597 adam turaqty jumyspen qamtylǵan.
