Shardaralyq túlekter alty balaly anaǵa páter syılady

ShARDARA. QazAqparat - Túrkistan oblysyndaǵy Shardara qalasynda túlekter kópbalaly otbasyǵa úsh bólmeli páter syılady, dep habarlaıdy QazAqparat tilshisi.

«Shardara» mektep-lıtseıin 2008-2009 jyly bitirgen túlekter «Qareket» qaıyrymdylyq qorymen birlese otyryp, 6 balasy bar jalǵyzbasty ana Elmıra Jańbyrovaǵa osyndaı tosynsyı jasady.

Buǵan deıin bul otbasy páter jaldap kelgen. Olar ózderine jasalǵan mundaı tartýǵa rıza bolyp, shyn júrekten alǵystaryn bildirdi. Orazada jasalǵan saýapty iske ustazdar qaýymy da dán rıza bolyp, baspanaly bolǵan otbasynyń jańa qonysqa shashýlaryn shashty.

Aıta keteıik, Shardara aýdany boıynsha bıylǵy jyly kópbalaly otbasylaryn qoldaýǵa aıryqsha kóńil bólinip otyr. Aýdan ákimdigi tarapynan buǵan deıin Q.Turysbekov aýylynan boı kótergen 10 páterli turǵyn úıdiń bireýi úshemderdi ómirge ákelgen Gúljanat Pernebaevaǵa berilse, jýyrda ǵana Qosseıit aýylynyń 20 jyldyq túlekteri ózderiniń synyptas dostary, 9 balany ómirge ákelgen Anastasııa Volokıtınaǵa jer ýchaskesin rásimdep, 3 bólmeli jańa úı salyp bergen bolatyn.