Shardaralyq ata-analardyń shaǵymymen jazǵy lagerde zerdeleý sharalary bastaldy
Shardaralyq bir top ata-ana balalaryn jibergen jazǵy lagerge qatysty shaǵymdaryn áleýmettik jeli arqyly jetkizdi. Onda vıdeo avtorlary demalys aımaǵynyń talapqa saı kelmeıtindigin aıtqan jáne tárbıeshilerdiń ishimdik iship alǵanyn sóz etken. Tipti, balalardyń da «úıge qaıtaıyqshy» degen sózderin jelige júktegen.
Atalǵan jaǵdaıǵa baılanysty Túrkistan oblystyq adamı áleýetti damytý basqarmasynyń baspasóz qyzmeti zerdeleý jumystary bastalǵanyn málimdedi.
«Áleýmettik jelide 1-2 ata-ana jazǵy-saýyqtyrý lageriniń jumysyna kóńili tolmaıtyndyǵyn jetkizip, ata-analarǵa ul-qyzdaryn alyp qaıtý jóninde aıtqan. Sodan ata-analar arasynda túsinispeýshilik týyndaǵan. Osyǵan oraı Túrkistan oblystyq adamı áleýetti damytý basqarmasy Tárbıe jáne qosymsha bilim berý bóliminiń basshysy J.Mahanbetov pen bas mamany K.Ospanova jáne Shardara aýdandyq adamı áleýetti damytý bólimi basshysynyń mindetin ýaqytsha atqarýshy A.Qadyrbaeva tarapynan zerdeleý jumystary júrgizilýde», - delingen aqparatta.
Jalpy, Shardara aýdandyq adamı áleýetti damytý bólimi men Túlkibas aýdany, Sastóbe aýylynda ornalasqan «Arman» jáne «Erke» jekemenshik jazǵy saýyqtyrý lagerleri arasynda túzilgen kelisim-shart negizinde 8 maýsymnan bastap 600 oqýshy demalysqa jiberilgen. Oqýshylar úshin lagerdegi demalys ýaqyty 10 kúndi qamtıdy. Munda demalýǵa negizinen kóp balaly, jartylaı jetim jáne az qamtylǵan otbasylardyń balalary kelgen.
