Shardaraǵa byltyrǵydan 15 mln tekshe metr sý az jınaldy

QYZYLORDA. KAZINFORM – «Shardara» sý qoımasyna osy kúni byltyrǵydan az sý tústi.

13 naýryz kúngi málimetke súıensek, munda 4698 mln tekshe metr sý jınalǵan. Bul ótken jyldyń esepti kezeńimen salystyrǵanda 15 mln tekshe metr az. 

– «Shardaranyń» jobalyq sý jınaý kólemi – 5200 mln tekshe metr. Qoımany toltyrýdy josparlap otyrmyz. Osyǵan deıin oǵan sekýndyna 500 tekshe metr sý jibersek, 12 naýryzdan beri 400 tekshe metr sý jibere bastadyq. Odan bólek «Kóksaraı» sý rettegishine de sý jınap jatyrmyz. Bıyl Syrdarııaǵa kóp sý túsedi degen boljam joq, – dedi Sý resýrstaryn retteý, qorǵaý jáne paıdalaný jónindegi Aral-Syrdarııa basseındik ınspektsııasy basshysynyń orynbasary Seıitqasym Ábýov. 

Vedomstvo ókiliniń aıtýynsha, ózen sýy el aýmaǵynda 6 sý toraby arqyly retteledi. Olardyń barlyǵy kópfaktorly zertteýden ótken. 

– Sondaı-aq Qyzylorda oblysynda jalpy syıymdylyǵy 34,7 mln tekshe metr bolatyn «Besaryq», «Jıdeli», «Manap», «Qyrash», «Kóltoǵan», «Qumsaı» sý qoımalary birneshe satyly tekserýden ótti. Olardaǵy sý kólemi – 17,2 mln tekshe metr. Óńirde taǵy 22 magıstraldy kanal, 1 qorǵanys dambasy, sý tastaıtyn 2 qurylys nysany, Soltústik Aral teńizi bógeti men 1 toǵan bar, – dedi Seıitqasym Ábýov. 

Keshe biz Qyzylordada kúnniń kúrt jylynýyna baılanysty seń júre bastaǵany týraly habarlaǵanbyz.