Shardaradaǵy jappaı atysqa qatysqan alty adamǵa sot sanktsııasy shyqty
TÚRKІSTAN. QazAqparat - Túrkistan oblysynyń Shardara aýdanynda aýyl turǵyndaryna oq atqan alty kúdiktige qatysty sot sanktsııasy shyqty. Qazirgi tańda Dostyq aýylynda bolǵan qylmysqa qatysy bar degen ekeý qamaýǵa alynǵan, dep habarlaıdy QazAqparat tilshisi.
Shardara aýdandyq sotynyń sýdıasy Saparhan Omarovtyń sózinshe, kúdiktilerdi eki aıǵa ýaqytsha tergeý abaqtysyna qamaý týraly qaýly tórt kúdiktige syrttaı shyǵaryldy. Óıtkeni olar áli polıtsııanyń qolyna túspegen. Jalpy, 28 - 32 jas shamasyndaǵy seziktiler Shardara aýdanynyń turǵyndary ekeni anyqtalǵan. Aralarynda bireýi buryn sottalyp, jazasyn ótep shyqqan.
«Alty kúdiktige qatysty Qylmystyq kodekstiń 99 babynyń 2 bóligi 1, 6, 7, 9 tarmaqtary («Adam óltirý»), 287 baby, 4 tarmaǵy (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) jáne 293 baptyń 3 bóligi, 2 tarmaǵy (Buzaqylyq) boıynsha is qozǵalǵan.
Eske salaıyq 7-shi qyrkúıek kúni Shardara aýdanynyń Dostyq aýylynda jappaı atys bolyp, 22 jastaǵy jigit mert boldy. Taǵy eki adam túrli oq jaraqatymen aýrýhanaǵa túsken edi. Keıinnen bul qylmysty jaǵdaıdyń oryn alýyna qaýyn artyp jatqan jerdegi jumysshylardyń arasynda janjal sebep bolǵany anyqtaldy. Jergilikti polıtsııa qazir aýyl jigitterine oq jaýdyrǵan tórt adamdy izdestirip jatyr.
