Shardaradaǵy atys: Úshinshi kúdikti ustaldy
TÚRKІSTAN. QazAqparat - Túrkistan oblysy, Shardara aýdanyndaǵy dıqandardyń arasyndaǵy atys boıynsha úshinshi kúdikti ustaldy. Bul týraly oblystyq ІІD baspasóz qyzmetiniń jetekshisi Saltanat Qarakózova málimdedi, dep habarlaıdy QazAqparat tilshisi.
Baspasóz qyzmetiniń jetekshisi Dostyq aýylynda bolǵan qylmysqa qatysy bar degen seziktiniń kórshiles oblystarynyń birinen qolǵa túskenin aıtady.
«Kúdikti Taraz qalasynan ustaldy. Qazirgi tańda ol sot sanktsııasymen ýaqytsha tergeý abaqtysyna qamaldy. Osy qylmysqa qatysy bar degen taǵy úsh adam izdestirilip jatyr. Seziktilerdiń jalpy sany alty adam. Olardyń bárin qamaýǵa alý týraly sot sanktsııasy shyqqan», - dedi Saltanat Qarakózova.
Eske salaıyq 7-shi qyrkúıek kúni Shardara aýdanynyń Dostyq aýylynda jappaı atys bolyp, 22 jastaǵy jigit kóz mert boldy. Taǵy eki adam túrli oq jaraqatymen aýrýhanaǵa túsken edi. Keıinnen bul qylmysqa qaýyn artyp jatqan jerdegi jumysshylardyń arasynda týǵan janjaldyń sebep bolǵany anyqtaldy.
28 - 32 jas shamasyndaǵy seziktiler Shardara aýdanynyń turǵyndary bolyp shyqty. Aralarynda bireýi buryn sottalyp, jazasyn ótep shyqqan. Olarǵa qatysty Qylmystyq kodekstiń 99 babynyń, 2 bóligi 1, 6, 7, 9 tarmaqtary («Adam óltirý»), 287 baby, 4 tarmaǵy (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) jáne 293 baptyń 3 bóligi, 2 tarmaǵy (Buzaqylyq) boıynsha is qozǵalǵan.
