Shardaradaǵy jaǵajaı retke keltirilip, demalýshylarǵa sapaly qyzmet kórsetile bastady
TÚRKІSTAN. KAZINFORM – Shomylý maýsymy bastalǵaly Túrkistan oblysyna qarasty jaǵajaı aýmaqtarynda qaýipsizdik jáne tazalyq sharalary kúsheıdi. Bul týraly Túrkistan oblysy ákiminiń baspasóz qyzmeti málimdedi.
Shardaradaǵy jaǵajaıda osyǵan deıin anyqtalǵan kemshilikter boıynsha naqty jumystar júrgizilip, demalýshylarǵa qolaıly jaǵdaı jasaldy.
Búgin oblys ákimi Nuralhan Kósherov «Shardara» sý qoımasynyń jaǵalaýynda ornalasqan birqatar demalys oryndaryn kezekti ret aralap, tazalyǵy pen qaýipsizdigin, ótken saparda berilgen tapsyrmalarynyń oryndalý barysyn baqylady. Oblys basshysy jaǵajaılarǵa jaýapty tulǵalarmen, kásipkerlermen júzdesip, munda sanıtarlyq tazalyq sharalaryn kúndelikti uqypty oryndaýdy tapsyrdy.
– Tazalyq pen qaýipsizdik – týrızmdi damytýdyń bir tetigi. Demalýshylarǵa, saıahatshylarǵa qolaıly jaǵdaı jasalýy kerek. Bul baǵyttaǵy jumystar jalǵasady, – dedi Nuralhan Kósherov.
Shardaradaǵy jaǵajaılar retke keltirilgen. Monıtorıng jumystary turaqty júrgizilip, polıtsııa qyzmetkerleri tarapynan qaýipsizdik talaptary qatań qadaǵalanýda. Tekserý barysynda 409 sákiniń 171-i talapqa saı bolmaǵandyqtan alynyp tastaldy. Qalǵan 238 sáki sý jaǵasynan 50 metrge jyljytyldy. Búginde munda 6 bıoájethana, 160 qoqys jáshigi, jáne 10 kıinýge arnalǵan kabına ornatyldy. Tazalyq jumystaryna 11 tehnıka, 80 jumysshy jumyldyrylǵan. Sonymen qatar jaǵalaýlardyń túbin tazalaý jumystary atqaryldy. Orman sharýashylyǵymen 5 kelisimshart toqtatyldy, polıtsııa qyzmetkerleri tarapynan 196 quqyqbuzýshylyq anyqtalyp, jalpy 36 hattama toltyrylyp, tıisti aıyppuldar salyndy. 1 demalys ornyna tekserý júrgizilip, talapty buzǵany úshin sotqa materıal joldandy. Kásipkerler de zań sheńberinde jaýapkershilikke tartylǵan.
Qazirgi ýaqytta jaǵajaı aýmaǵyna 16 qutqarýshy bekitilip, qalqymaly qaýipsizdik belgileri ornatylǵan. Jalpy sý qoımasynyń kólemi 5,2 mlrd. tekshe metr. Al uzyndyǵy 80 shaqyrymdy quraıdy.
N.Kósherov jaýaptylarǵa qolda bar múmkindikterdi paıdalana otyryp, demalýshylarǵa qolaıly jaǵdaı jasaýdy mindettedi. Shomylý maýsymyn oıdaǵydaı atqarýdy tapsyrdy.
Aıta keteıik, Túrkistan oblysyna kelýshi saıahatshylar sany jyl saıyn artyp keledi. Bıylǵy 5 aıda Túrkistan óńirindegi tarıhı oryndarǵa 424 myń adam saıahattap, ótken jyldyń tıisti kezeńimen salystyrǵanda 9 paıyzǵa artqan. Tabıǵı aýmaqtarǵa saıahattaýshylar sany 58 myńǵa jýyqtap, ótken jyldyń osy kezeńimen salystyrǵanda 2 esege kóbeıgen. «E-qonaq» júıesindegi derekterge sáıkes, bıylǵy 5 aıda Túrkistan oblysyna 18699 sheteldik týrıst kelgen. Bul – ótken jyldyń tıisti kezeńine qaraǵanda 2 ese kóp. Ásirese, Ózbekstan, Túrkııa, Reseı, Qytaı, Qyrǵyzstan elderinen saıahatshylar kóp kelgen.
Buǵan deıin habarlanǵandaı, Týrızm jáne sport mınıstrligi elimizdiń týrıstik óńirlerine jasalǵan ınspektsııalyq saparyn aıaqtap, nátıjesinde Aqmola oblysynda 41, Mańǵystaýda 33 týrıstik nysan tekserildi.