Shardaradaǵy ekologııalyq jaǵdaıǵa baılanysty turǵyndarmen kezdesý ótti
ASTANA. KAZINFORM — Túrkistan oblysynyń prokýrory Murat Tleýberdıev, onyń birinshi orynbasary Saıan Keldibekov jáne oblystyq polıtsııa departamentiniń bastyǵy Murat Qabdenov Shardara aýdanyna issaparmen bardy, dep habarlaıdy oblystyq prokýratýranyń baspasóz qyzmeti.
Olardyń bul sapary aýdandaǵy ekologııalyq jaǵdaıdyń kúrt nasharlaýyna baılanysty uıymdastyryldy. Sapar barysynda atalǵan basshylar jaǵdaıdy óz kózderimen kórip, tekserý júrgizdi. Sonymen qatar, olar aýdan turǵyndarymen jeke qabyldaý ótkizip, halyqtyń shaǵymdary men usynystaryn tyńdady.
Árbir ótinish muqııat ári kásibı túrde qaraldy.
Birqatar máseleler boıynsha sol jerde tolyq túsiniktemeler berildi, al keıbir ótinishter qosymsha qarastyrý jáne tıisti sharalar qabyldaý úshin baqylaýǵa alyndy.
Oblys prokýrory halyq pen tikeleı baılanys ornatýdyń mańyzdylyǵyn atap ótti.
— Bizdiń mindetimiz — azamattardy tyńdap qana qoımaı, olardyń máselelerin sheshýge naqty kómektesý. Tek ashyq dıalog arqyly senim ornatyp, zań ústemdigin qamtamasyz etýge bolady, — dedi Murat Tleýberdıev.
Qabyldaý qorytyndysy boıynsha beıindi bólimshelerdiń basshylaryna naqty tapsyrmalar berilip, olardy oryndaý merzimderi belgilenip, árbir ótinishti qaraý boıynsha baqylaý uıymdastyryldy.
Buǵan deıin Shardara sý qoımasynda sý deńgeıiniń tómendeýinen qalada aýyz sý tapshylyǵy týyndaǵany týraly aqparat tarady.