Shardarada jelkendi qaıyq sportynan Qazaqstan kýbogy ótip jatyr
TÚRKІSTAN. QazAqparat - Túrkistan oblysynyń Shardara qalasynda jelkendi qaıyq sportynan Qazaqstan Respýblıkasynyń ashyq kýbogy ótip jatyr, dep habarlaıdy QazAqparat Olympic.kz silteme jasap.
Qaıyq sportynda Qazaqstan jáne Ózbekstan sportshylary da baq synaýda.
«Bul jarysqa bir jylǵa jýyq daıyndaldyq. Kýbokti dál osy Shardaradaǵy sý qoımada ótkizý týraly bastamany oblystyq qaýymdastyq kótergen bolatyn. Maqsatymyz - jelkendi qaıyq sportyn damytyp, myqty sportshylar daıyndap shyǵarý. Negizinen bizdiń oblysta sporttyń osy túrin damytý úshin dál osy Shardara sý qoımasy taptyrmas oryn. Klımaty jaǵynan da yńǵaıly», - dedi Túrkistan oblystyq eskek esý jáne jelkendi qaıyq sporty assotsıatsııasynyń tóraǵasy, Qazaqstannyń eńbek sińirgen jattyqtyrýshysy Denıs Jarmenov.
Oblysta alǵash ret ótkizilip otyrǵan dodada 100-ge jýyq sportshy ózara besekelesýde. Atap aıtqanda, Túrkistan, Qaraǵandy, Almaty oblystary men Ózbekstan quramasynyń sportshylary kýbokke talaspaq.
«Meniń jelkendi qaıyq sportymen aınalysyp jatqanyma kóp bola qoımady, nebári bir-aq jyl. Biraq osy bir jyl ishinde túrli dárejedegi alty medaldy enshilep úlgerdim. Qazaqstan quramasynyń sportshysymyn ári el chempıony degen ataǵym bar. Negizinen, kópshilik bul sport túri qyz balasy úshin aýyrlaý ekenin aıtady. Menińshe, kez kelgen sporttyń óz qıynshylyǵy men qyzyqty tustary bolady. Iá, alǵashynda meniń de qaıyqty ıgere almaı, biraz qınalǵanym bar. Biraq ter tóge jasaǵan jattyǵýdyń arqasynda qaıyqty ıgerýdiń qyr-syryn úırendim. Bul Kýbokte ózime birinshi oryn alý kerek degen maqsat qoıyp otyrmyn. Baǵyma qaraı kórermin»,- dedi jas sportshy Adelına Rechko.
Sonymen qatar, Adelına Shardara sý qoımasynan oqý-jattyǵý jumystaryn jasaıtyn baza salynsa, jyl boıyna daıyndyq úzilmes edi degen tilegin de jasyrmady.
Qaıyqtar jarysy 30 naýryz kúni óz máresine jetedi.
