Shardarada jańa balyq zaýyty iske qosyldy

ShYMKENT. QazAqparat - Búgin Shardara aýdanynda el Táýelsizdiginiń 25 jyldyǵyna oraı jańadan balyq zaýyty iske qosyldy. Údemeli ındýstrıaldy-ınnovatsııalyq damý baǵdarlamasy aıasynda 200 mln. teńgege qurylys jumystary júrgizilgen jańa ǵımarattyń ashylý saltanatyna oblys ákimi Janseıit Túımebaev qatysyp, quttyqtaý sóz sóıledi.

«Qurmetti shardaralyqtar! Mereke qarsańynda 40 adamdy jumyspen qamtyǵan jańa zaýyt ashylyp jatyr. Eldiń áleýmettik-ekonomıkalyq jaǵdaıyn arttyratyn bul jumys orny qutty bolsyn. Zaýyttyń iske qosylýyna muryndyq bolǵan jeke kásipker Talǵat Jalǵasbaevqa alǵysym sheksiz. Ol óz ónimimizdi uqsatyp, alys jáne jaqyn shet elderge shyǵaryp otyr. Olaı bolsa, jańa kásiporyn ıgilikterińizge jumys isteı bersin degim keledi», - degen Janseıit Qanseıituly bir top ardagerlermen birge jańa ǵımarattyń lentasyn qıdy, dep habarlaıdy OQO ákiminiń baspasóz qyzmeti.  

 

Kásiporyn basshysy Talǵat Jalǵasbaev oblys ákimine zaýyttyń ishi-syrtyn kórsetip, balyq óńdeý protsesimen tanystyrdy. Teńiz jaǵasynan boı kótergen balyq óńdeý kásipornynda balyq eti men tuzdalǵan jáne qaqtalǵan balyq ónimderi óndiriledi. Al jyldyq qýattylyǵy 600 myń tonna balyq ónimderin quraıdy.

Básekege qabiletti balyq ónimderin shyǵaratyn bul zaýyttyń mańyzy zor ekenin aıtqan aımaq basshysy kásiporyn jumysyna sáttilik tiledi.  

Aıta keteıik, buǵan deıin aýdanda eki balyq óńdeý zaýyty jumys istep kelgen bolatyn. «Hamıt» STK-i men «Shardara balyq - 1» balyq óńdeý zaýyttary bıylǵy jyly esepti merzimde 3700 tonna balyq ónimderin óndirip, alys-jaqyn shet elderge eksportqa shyǵaryp otyr.

   Shardara aýdanyna jumys sapary barysynda ákim Shardara sý elektr stansasynyń jumysymen de tanysty.