Shardarada túıeshilerdiń halyqaralyq jarysy ótedi
TÚRKІSTAN. QazAqparat -Túrkistan oblysy Shardara qalasynda alǵash ret «Safari Shardara» halyqaralyq festıvali ótedi. 26 qazan kúni Shardara sý qoımasynyń jaǵalaýynda uıymdastyrylatyn sharada qonaqtar Qyzylqum óńiriniń tabıǵatymen keńinen tanysyp, túrli oıyn-saýyqtar men sporttyq jarystardy tamashalaıtyn bolady, dep habarlaıdy QazAqparat tilshisi.
Elbasynyń «Bolashaqqa baǵdar: rýhanı jańǵyrý» baǵdarlamasy aıasynda ótkiziletin festıvalde avtokólikterdiń qumdaǵy jarysy men kompozıtsııalyq «Rock racing» shoýy uıymdastyrylady. Sondaı-aq qonaqtar túıeshiler jarysyn, búrkit pen qarshyǵaǵa qus ildirip, túlki saldyrǵan saıatshylardyń halyqaralyq saıysyn tamashalaıdy. Budan ózge, motobaıkerlerdiń motokross óneri, jelkendi qaıyq jarysy, akademııalyq esý túri, jaǵajaı voleıboly men fýtbol jarystary, balyq aýlaý saıysyn ótkizý josparlanǵan.
Sonymen qatar, saıypqyrandar qazaqsha kúres, gir tasyn kóterý, bórenege órmelep shyǵý, qoshqar kóterý sekildi sport túrlerinen baq synaıtyn bolady.
«Safari Shardara» festıvalinde áıgili óner juldyzdary men án-bı ansambalderi, tsırk ónerpazdary men akrobattar óner kórsetedi dep kútilýde.
