Shardarada toqqa qosylǵan qarmaqpen balyq aýlaǵandar ustaldy
ASTANA. QazAqparat - Shardara sý qoımasynda zańsyz balyq aýlaǵan brakonerler qolǵa tústi, dep habarlaıdy QazAqparat.
QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet feısbýk paraqshasynda jazǵandaı, oqıǵa 2019 jyldyń 28 aqpanynda tirkelgen. «Ohotzooprom» ÓB» RMQK-nyń Qyzylorda óńirlik fılıal ınspektorlary men Shardara orman sharýashylyǵy jáne janýarlar dúnıesi bóliminiń mamandary birlesken reıdtik shara barysynda Shardara sý qoımasynda tyıym salynǵan balyq aýlaý quraldarymen zańsyz balyq aýlaǵan Maqtaaral aýdanynyń eki azamatyn quryqtaǵan.
«Zań buzýshylar úrlemeli rezeńke qaıyqqa minip, sý qoımada elektr toǵyna qosylǵan qarmaqpen 60 keli sazan balyǵyn zańsyz aýlaǵan. Oqıǵa ornynan 60 keli sazan balyǵy, úrlemeli rezeńke qaıyq eskegimen, jel bergish, projektor, akkýmýlıator men elektr toq kóbeıtkishi tabyldy. Ustalǵan azamattar Shardara aýdandyq polıtsııa bólimine jetkizilip, Qazaqstan Respýblıkasynyń Qylmystyq Kodeksiniń 335-babynyń 3-bóligimen qylmystyq is qozǵaldy», - dep jazady Sáken Dildahmet.
