Shardarada polıtseı er adamdy sýdan qutqaryp qaldy
TÚRKІSTAN. QazAqparat - Túrkistan oblysy, Shardara aýdanynda sýǵa batyp bara jatqan egde jastaǵy adamdy polıtsııa qyzmetkeri qutqaryp qaldy, dep habarlaıdy QazAqparat tilshisi.
Tártip saqshylary jergilikti turǵynǵa alǵashqy medıtsınalyq kómek kórsetip, ony emhanaǵa jetkizgen. Oblystyq Polıtsııa departamenti baspasóz qyzmetiniń málimetinshe, oqıǵa 15 maýsym kúni keshki saǵat 19:00 shamasynda Syrdarııa ózeninde bolǵan. ıÝvenaldy polıtsııa tobynyń ınspektory, polıtsııa kapıtany Shaýkat Ibadýllaev pen áriptesi Aıdana Nahanshaqy ózen mańynda reıdtik aralaý kezinde sýǵa batyp bara jatqan adamnyń daýysyn estigen. Ekeýi sýdyń ishindegi egde tartqan er azamatty kórgen. Áp-sátte táýekelge bel býǵan Shaýkat Ibadýllaev birden sýǵa súńgip, ony jaǵaǵa alyp shyǵady. Jaǵada turǵan áriptesi ekeýi ony birden qurǵaq kıimge oraǵan. Búgingi tańda jergilikti turǵyn emhanada em qabyldap jatyr. Dárigerlerdiń aıtýynsha, onyń jaǵdaıy qalypty, ómirine eshqandaı qaýip joq.
Ajalǵa arasha bolǵan Shaýkat Ibadýllaev ishki ister organy qatarynda 2005 jyldan bastap qyzmet istep kele jatqan tájirıbeli maman. Onyń aıtýynsha, sý birshama tereń bolǵan.
«Bul eshqandaı da erlik emes, sanaýly ýaqytta, kózdi ashyp jumam degenshe tez-tez ótken oqıǵa boldy. Ne bolǵanyn ózim de túsinbeı qaldym. Sýǵa batyp bara jatqan álgi adamdy kóre salysymen birden sýǵa súńgip, bar oıym tek sol azamatty qutqarý jáne aman alyp qalý boldy. Polıtseı retinde aıtarym, sýǵa túserde árbir azamat qaýipsizdik sharalaryn eskerip, abaı bolsa eken»,- deıdi ıÝvenaldy polıtsııa tobynyń ınspektory, polıtsııa kapıtany Sh.Ibadýllaev.
