Shardarada muǵalim taıaq jedim dep shaǵymdanǵan mekteptiń dırektory qyzmetinen alyndy

TÚRKІSTAN. QazAqparat - Túrkistan oblysynyń bilim salasynda sapany qamtamasyz etý departamenti Shardara aýdany T. Aıbergenov atyndaǵy mektep-gımnazııasynyń muǵalimi S. Jaqypovanyń áleýmettik jelide jarııalaǵan beıneúndeýin qarady, dep habarlaıdy QazAqparat.

Aıta keteıik, munyń aldynda mektep dırektorynyń orynbasary men muǵalimniń arasynda pedagogıkalyq júktemeni muǵalimder arasynda bólýge baılanysty daý týyndaǵan edi.

T. Aıbergenov atyndaǵy mektep-gımnazııasynyń dırektory M. Qanybekov qyzmetinen bosatyldy.

Dırektordyń orynbasary R. Musalıevaǵa qatysty 409-bap boıynsha «Pedagogke óziniń laýazymdyq mindetterin oryndaý kezinde qurmet kórsetpegeni úshin» ákimshilik is qozǵaldy.

«Shardara aýdandyq soty dırektordyń orynbasaryna 30 AEK kóleminde aıyppul tóleý týraly sheshim shyǵardy. Qazirgi ýaqytta mektep dırektorynyń orynbasaryn qyzmetinen bosatý máselesi sot tártibimen qaralyp jatyr» delingen departament habarlamasynda.

Aıta keteıik, mektepter zań júzinde ákimdikterdiń qaramaǵynda. Bilim basqarmalarynyń basshylaryn ákimder taǵaıyndaıdy.

Al óz kezeginde basqarma basshylary mektep dırektorlaryn taǵaıyndaıdy. Sondaı-aq qarjylandyrý da ákimdikter quzyrynda.