Shardarada mektep dırektory kóligimen oqýshyny qaǵyp ketti
ShARDARA. QazAqparat – Túrkistan oblysynyń Shardara aýdanynda mektep dırektory kóligimen 6 jasar balany qaǵyp ketti, dep habarlaıdy QazAqparat tilshisi.
Kýágerlerdiń aıtýynsha, oqıǵa sport mektebiniń mańynda keshe keshkisin saǵat bester shamasynda bolǵan.
«Toıota kamrı» markaly kóligin tizgindegen dırektor 1 synyp oqýshysyn qaǵyp, jaraqattaǵan. Jeńil kólik qaqqan bala aýdandyq aýrýhanaǵa jetkizilgen.
Dárigerlerdiń sózinshe, jetkinshektiń jaǵdaıy qalypty.
«Balanyń jeńil túrde mıy shaıqalǵan. Betinde syrylǵan jerleri bar. Biraq esh jeri synyp, jaraqat almaǵan. Qazirgi tańda jaraqat bóliminde anasymen birge jatyp, em qabyldaýda. Jaǵdaıyna qaraı aýrýhanadan shyǵarylatyn bolady»,- deıdi aýrýhananyń dárigerleri.
Al, óńirdiń polıtseıleri osy oqys jaǵdaıǵa baılanysty tıisti saraptama taǵaıyndalyp, tekserý sharalary júrgizilip jatqanyn aıtady.
«Bul jol kólik oqıǵasy Shardara aýdandyq PB tirkeldi. Qazirgi tańda aýdandyq Ákimshilik polıtsııa qyzmetkerleri bul jaıtty tekserý ústinde. Saraptamalar taǵaıyndaldy»,- dedi oblystyq PD baspasóz qyzmetiniń jetekshisi Saltanat Qarakózova.
