Shardarada maqta óńdeý kompanııasy aýrýhanalarǵa 10 ottegi kontsentratoryn syıǵa tartty
ShARDARA. QazAqparat – Túrkistan oblysy, Shardara aýdandyq ortalyq aýrýhanasyna jomart jandardyń demeýshiligimen 10 ottegi kontsentratory tabystaldy. «ICC» maqta óńdeý kompanııasy Qazyǵurt jáne Tólebı aýdandyq ortalyq aýrýhanalaryna da tynys alý apparattaryn tartý etti, dep habarlaıdy QazAqparat tilshisi.
Koronavırýs ınfektsııasymen kúreste asa qajetti apparatty qabyldap alǵan aýdandyq aýrýhananyń bas dárigeri Nurjan Nóserov ottegi kontsentratorlarynyń sany osymen 40-qa jetkenin atap ótti. Emdeý mekemesine jýyrda ǵana jyljymaly medıtsınalyq keshen berilgen bolatyn. Kóshpeli emhana aýdan ortalyǵynan shalǵaı ornalasqan aýyldardarǵa baryp medıtsınalyq kómek kórsetetin bolady. Zamanaýı medıtsınalyq keshen flıýorografııa, ýltra dybystyq zertteý, EKG, oftalmoskop, otorınoskop, zerthana jáne jalpy tájirıbeli dáriger kabınetimen jabdyqtalǵan. Qazirgi tańda aýrýhanada koronavırýs ınfektsııasymen em qabyldap jatqan naýqas joq. Degenmen yqtımal ekinshi tolqynǵa daıyndyq barysynda aýrýhana 200-ge jýyq pýlsoksımetr, 9 dana IVL-men qamtylǵan. 100 tósek oryn ortalyqtandyrylǵan ottegi núktesimen jasaqtalǵan. Medıtsınalyq uıymnyń qyzmetkerleri tarapynan koronavırýsqa qarsy operatıvti jospar daıarlanyp, medıtsınalyq qorǵanys quraldary men eki aılyq dári – dármek qory jınaqtalǵan. Covid-19 indetine shaldyqqan naýqastarǵa medıtsınalyq kómekti kórsetý úshin 16 mobıldi top qurylǵan.
